Montardo 2.833 m eta Montardo Petit 2.781 m

Capra Alpina(e)k idatzia.
89
bisita

Montardo edo Montarto, Erdi Pirineoko mendi ezagunetariko bat da eta Aigüestortes Parke Nazionaleko behatoki ezin hobea. Naiz ipar aldetik begiratuz bere itsura oso malkartsua ageri den, hego aldetik oso xamurra dirudi eta hori dela eta, mendi eskiko ibilbide klasiko bat bihurtu zaigu. Gaur proposatzen dizuegun ibilbidea Cavallers Urtegitik (Vall de Boi) hasten da eta  Aigüestortes eta Estany de Sant Maurici Parke Nazionaletik oso osorik igaroko da.

Parke Nazionaleko informazio gunetik pasa eta Casvallers urtegiko aparkalekura iritsi (1.784 m) eta eskuinetik igoz, hormaren goi aldera iristen gara. Tarteka arlosatua ageri den ibilbide zabal batetik jarraitzen dugu goi-ibarrera bitarte, beti ere urtegiko urak ezkerrean eramanez. Urtegira bere urak ixurtzen dituen ur-jauzi baten paralelo igoz, Planell de Riumalo aran zabalera iristen gara (1.855 m).

Uharra egurrezko zubi batetik zeharkatzen dugu eta ezkerrean Besiberris eta Comaloformo-ra doan bidea utziz, horiz koloreztatuak dauden posteak jarraituz aurrera jarraitzen dugu. Aigüestortes Parke Nazionalean sartzen garela adierazten digun kartel batekin topo egitean, Llastres de la Morta izenez ezagutzen den gunetik sigi-saga ugariz altuera irabazten hasten gara.

Malda erdian ur-jauzi txiki bat ikusten dugu eta gainditu ostean, granito bloke handi batzuen laguntzaz uharra zeharkatzen dugu. Horiz koloreztaturiko posteak jarraituz xamurragoa den desnibeletik gorantz jarraitzen dugu, Estany Negre glaziar jatorria duen lakuaren profil luzanga ikustea lortu arte. Lakuaren beste muturreko kokaleku paregabean eta bere uraren mailaz goitik aurkitzen den irtengune baten gainean, Ventosa i Calvell aterpetxea (2.220 m) ikus dezakegu eta bertara bideratzen gara. 2:00h. 

Bidegurutze batera metro gutxi batzuek jaitsiz, berriz ere eskuinetik ipar norabidean gorantz hasi gara. Bereala Pletiu de Travessani sarreran laku txiki batekin topo egiten dugu eta ezker bazterretik zeharkatuz, Estany de Travessani ederrera iristen gara (2.250 m). Ezker bazterretik gorantz jarraitzen dugu bereala metro batzuek berantz egin eta Estany Clot eskuin bazterrera iristeko (2.302 m). Aurrera jarraituz urmael txiki batekin topo egiten dugu malda belartsu bat igo aurretik, zeren Estany de les Mangades lakura eramaten gaituen (2.380 m).

Bide nabariak bloke handien artetik malda txiki bat igoz jarraitzen du, non laku txiki batek atseden hartzen duen eta bertatik, Montardo Petit gailurra (2.781 m) ikusteaz gain, Montardo gailurra (2.883 m) neba txikiaren atzean lotsati ageri zaigu. Minutu gutxi batzuek eta Estany des Monges (2.420 m) lakura iristen gara. Glaziar jatorriko laku honek 15 ha-ko azalera du eta 51 metroko sakonera. Bere inguruan Cerro de Monges (O), Coret de Oelhacrestada (N), Montardo (N) eta Agulhes deth Puerto (NE) nabarmentzen dira.

Lakuaren ezker bazterretik GR 11/18 ibilbidea jarraitzen dugu, Carros de Foc zeharkaldi ezagunaren zatia denetik, Coret de Oelhacrestada (2.474 m) lepora iristea lortuz. Lepoa Sierra de Tumeneia ertzean aurkitzen da, Cerro de Monges (O) eta Petit Montardo (N) artean. Restanca aterpetxe ingurutik datorkigun lainoak, momentu batzuetan zailtasunak sortzen dizkigu bidea behar bezala jarraitu ahal izateko. 

Oso higatua aurkitzen den bideak, inongo zailtasunik gabe Montarto ekialde lepora bideratzen gaitu (2.730 m), 250 metro desnibel gainditu ostean bertara iristea lortuz. Ezkerrean Montarto Petit (2.785 m) eta eskuinean Urmaelak edo Basses del Montardo uzten ditugu, bi mendien artean aurkitzen den lepora bideratu ahal izateko (2.750 m). 

Malda belartsutik igotzea besterik ez dugu gailurrera iristeko, bainan bi bide oso nabariak ikusten ditugunez zalantza dugu nondik segi. Erdi erditik sigi-sagak eginez igotzen denetik jarraitzea erabaki dugu Montardo gailurra iristea lortuz (2.883 m). Gailurra oso zabala da eta harri ugariz osaturiko mugarri handi bat du. Jaitsiera berriz, ertz ondoan aurkitzen den bidetik egingo dugu, horrela ibilbidea borobilduz. 

Naiz talaia paregabea den eta 360º-ko ikuspegi ikusgarria duen, mendebaldean aurkitzen den Restanca ingurutik igo eta inguratzen gaituen lainoak, paisai ederrez gozatzeko aukera gutxi ematen digu. Hego aldean lainorik ez denez, Punta Alta de Comalesbienes (3.014 m) guneaz gozatzeko aukera ezin hobea dugu. 

Bi mendien arteko lepora jaitsi gara (2.750 m) eta jarraian ertz lerroa jarraituz, inongo zailtasunik gabe eta minutu gutxiren bueltan, Montardo Petit gailurrera iristen gara (2.781 m), non harri bakan batzuekin osaturiko mugarri bat aurkitzen dugu. Aranetik igotzen den lainoak, ingurua bakoitzean estaliagoa duenez oso zail egiten du ikuskizunez gozatu ahal izatea. 

Ohiko bidera jaitsi gara eta atzera eginez, Coret de Oelhacrestada (2.474 m) eta Estany des Monges-a itzuli gara. GR 11/18 bidean atzera eginez Ventosa i Calvell aterpetxera (2.220 m) iristen gara, non atsegin momentu bat hartzen dugun. Jarraian Cavallers urtegira jaitsi (1.784 m) eta ondoren zortzi ordu lehenago autoa utzi dugun aparkalekura iristen gara, ibilbidea bukatutzat emanez. 

Datu teknikoak

  • Ibilbidea: Montardo Montardo Cavallers urtegitik
  • Luzera:22.050 m.
  • Desnibela:1.257 m.
  • Kokapena:Pirinioak
  • Kategoria : Oinezko igoera
  • Zailtasuna:F
  • Hasiera puntuan amaitzen da:Bai
  • Nola iritsi:Cavallers urtegiko horma ondoan dagoen aparkalekutik, Boi Arana (Lleida)
  • Igotzeko denbora:8:00h
  • Ezaugarriak:Ibilbidea osoa Aigüestortes eta Estany Sant Maurici Parke Nazionaletik doa
  • Egoera:Ibilbide luzea bainan oso ongi markatua, non jende ugari aurkitu dezakegun
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.