Tuc de Molières - 3010 m

Capra Alpina(e)k idatzia.
108
bisita

Maladeta-Aneto mendiguneko hirumilako ekialdeena dugu eta hori dela eta, behatoki paregabea iparrera erortzen diren hormek ikusi ahal izateko. 2011 udaran eraikia izan zen Molières aterpetxe berri inguruan dauden lakuetan, Noguera Ribagorzana ibaiak du jatorria, naiz 133 km egin ondoren, bere urak Segre ibaian isurtzen dituen. 

Sant Nicolau (1.603 m) aterpetxe zahar inguruan dagoen aparkalekutik abiatu gara eta Vielha tunelaren hego aho gainetik pasaz, Molières bailaran sartu gara. Oso nabaria den xenda jarraitzen dugu eta minutu batzuen ondoren pago baso eder batetan murgiltzen gara eta altuera irabazten hasi, ur jauzi eder baten ingurutik pasaz.

Berehala ordeka batera iristen gara, Pla d´Aiguamoll, eta gorantz emeki jarraituz irtengune batekin topo egiten dugu. Honen ezkerretik uhar saltari bat jausten denez, eskuinean duen korridore txiki batetik igoz, Pleta Nova gunera iristen gara (2.000 m). 

Arroka kaos batetik jarraituz arresi batera iristen gara eta eskuinetik igoz saihestu behar dugu. Xenda nabariak arroka eta lur guneetatik sigi-saga ugariz altuera azkar irabazten du. Arresiaren goi aldera iristean, ezkerrera egin eta dagoeneko gune lasaiago batetik, Estanhot de Molières lehen lakura iristen gara (2.300 m). Eskuinera eginez muino baten gainean dagoen Molières aterpetxera doan azken malda igotzen dugu (2.360 m). 

Sakanaren ezker aldetik xenda jarraitzen dugu, harri handien artetik altuera irabaziz. Gure ezkerrera txikiagoa den bigarren laku bat utzi, hirugarren eta handiena denera iritsi ahal izateko, non eskuinera bira egiten dugun eta malda gogor bat igo zirkuaren sarrerara iristeko.

Gorantz goaz ezkerrerako norabidea segiz hormaren oinpea bila, beti ere malda gogorrak igoz, harri bloke artetik eta ikusten ditugun hitoak jarraituz. Hainbat uhar zeharkatzen ditugu eta elurte txiki batzuek ere, naiz azken hauek saihestu daitezkeen.

Igoera bloke handi artetik hitoak jarraituz eskuinerantz jarraitzen dugu, gure gainean oso nabaria ikusten den lepora bilatuz. Honek azken metroetan eskuak erabiltzea eskatzen du (II) Coret de Molières bretxara iritsi ahal izateko (2.935 m), naiz zailtasunik ez duen.

Behin lepora iritsiz gure ezkerrera bira egin (SSO) eta bloke handien artetik altuera irabazten goaz, inongo zailtasunik gabe, Tuc de Molières edo Tuca de Mulleres tontorra iritsi arte (3.010 m).

Begiratzen dugun aldera begiratuta ere ikuskizuna segurtatua dugu. Aneto, Pico Rusel, Cresta Salenques-Tempestades, Maladeta, Poset, Besiberris, edo 360º-tan ikus daitezkeen beste edozein mendi ikusi ahal izateko, honera igotzeak ondo merezi du.

Jaitsiera igo garen bide berberetik egingo dugu eta 1:30 h eta gero, berriz ere, Sant Nikolau aterpetxe zahar inguruan dagoen aparkalekura itzultzen gara.

Datu teknikoak

  • Ibilbidea: Tuc de Molières Vielha tunelaren hego aho eta Molières aterpetxetik
  • Igoera data:2019-08-02
  • Luzera:6.920 m.
  • Desnibela:1.355 m.
  • Kokapena:Pirinioak
  • Kategoria : Oinezko igoera
  • Zailtasuna:F+
  • Hasiera puntuan amaitzen da:Bai
  • Iristeko denbora:3:40 h
  • Nola iritsi:Vielha tunelaren hego aho eta Molières aterpetxetik
  • Igotzeko denbora:5:10 h
  • Jeisteko denbora:1:30 h
  • Ezaugarriak:Lehen zatia xenda nabarmen batetik eta bigarrena berriz, harri bloke handien artetik Coret de Molières bretxa irabazi bitarte (2.935 m)
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.