La Altiquera - 1.947 m

Capra Alpina(e)k idatzia.
419
bisita

Udzakeneko Lehen elurteekin batera, kranpoi eta pioletei hautsak harrotu eta gure mendien hormetan nabarmentzen hasi diren pitzadura eta korridoreekin amets egiteko aukera ezin hobea dugu. Covadonga lakuetara gerturatu gara, Picos de Europa Parke Nazionaleko asturiasko lurretan, Erdialdeko Mendigune edo Covadongakoan, negu denboraldiari hasiera eman eta gustokoa dugun pasioaz gozatze asmotan. 

Enol lakutik Vega de Enol eta Mirador del Rey-ra doan pista hartzen dugu eta gertu gelditzen den aparkalekuan autoa utzi eta bertatik, Pozo del Aleman norabidean ibiltzen hasi gara. Zubi txiki bat zeharkatuz ibaiaren beste aldera igaro eta gorantzko bideari ekiten diogu. Denbora gutxi barru saroi txiki batera heldu gara, non erdi erdian bloke handi eta borobil bat duen, Vega de la Piedra bere izena.

Canraso ordekatik zehar jarraitzen dugu, alfonbra berde batetik bailitzan ibiliz eta malda pare bat gainditu ostean, Rondiella izena duen bigarren saroi batera iristen gara. Gamonal lepora bidean jarraitzen dugu, non bertatik Vegarredonda aterpetxea (1.460 m) ikusten dugun. 1987 urtean eraikia eta 58 pertsonentzako edukiera duena.

 

Aterpetxe zaharra bitarte (1.994 m) jarraitzen dugu, gaur egun libre bada ere Vegarredonda aterpetxeko zaindariaren aginduetara dago eta ori dela eta, normalean itxia egoten da. Ibar sakonetik Porru Bolu (1.994 m) harritzar ikusgarriaren norabidean jarraitzen dugu eta bertan, ibilbidea zailduko digun elurra agertzen hasi da. 

Porru Bolu gure eskuinean utzi eta ezkerretik La Fragua lepora norabidean jarraitzen dugu. Elurretan aurrera egitea bakoitzean zailagoa egiten zaigu. Goiko geruza erabat izoztua aurkitzen bada ere, behin hau haustean belauna edo batzuetan gerria bitarte elurretan sartzen gara. Esfortzu handia egin eta gero azkenik La Fragua lepora (1.922 m) iristea lortu dugu, non haize izoztu batek ongi etorria ematen digu.

Zalantza une bat eduki dugun arren, Torre de Santa María (2.478 m) eta bere Marqués korridore kalisokoa norabidean jarraitzea erabaki dugu, naiz eta elurra egoera onean ez dagoen. Argaos mendi magaletik eta elur ezegonkorretik zeharkaldi diagonala eginez goaz, non bat batean belauneraino sartzen garen eta beste batzuetan granpoien puntak ere sartzen ez diren. 200 m oso zail ondoren amore eman eta berriz ere La Fragua lepora itzultzen gara, elurra ez bai dago oraindik egoera egokian eta ibiltzea ere oso zail egiten zaigu. 

Dagoeneko La Fragua lepora itzuli gara eta Marqués Korridore oinarrira iristea ezinezkoa denez, eguna baliatu asmoz La Altiquera mendira igotzeko asmoa dugu. Lepo bertatik gora egiten dugu leitze sakon baten ahora bitarte (F) eta behin eskuinean hau utziz, helduleku onak dituen tximinia erraz batetik (I+) muino txiki batera iristen gara..

Bretxa txiki batera jaisten gara azken igoera hasi aurretik, bi isurialdera erorketa nabarmena duena. Diagonalean ezkerretik igotzen hasten gara plaka lehun batzuetatik (II+), tontor ertzera iristea lortuz. Bertatik La Altiquera (1.947 m) tontor buzoira apenas metro gutxi batzuek geratzen zaigu.

Bertatik dauden bista ikusgarriek hitzik gabe uzten gaituzte, bereiziki Torres de Cebolleda (2.429 m) eta Torre de Santa María (2.476 m), zeharkatzen duen Marqués korridore klasikoa barne. Azken hau elur baldintza hoberen zain egiteke uzten dugu.

Ikuskizun bereizi hau Torre de los Cabrones (2.290 m), Pico de los Asturianos (2.274 m) eta Torre de los Traviesos (2.385 m)mendietara ere luzatu dezakegu.

Itzultzeko orduan plaka lehunak tentu handiz jaisten ditugu eta behin La Fragua mendi lepoan, elurra saihestu asmoz harriak bilatuz beherantzko bideari ekiten diogu. Aterpetxe zaharraren inguruan elurra desagertzen da eta Vegarredonda edo José Mª Remís aterpetxe ingurutik pasa ondoren, Gamonal lepora igotzen gara. Hemendik aurrera jaitsierak zelai belartsu batetik jarraitzen du, lurrean tente jarriak dauden harri segida jarraituz eta behin atzean Rondiella eta Vega de la Piedra saroiak utziz, ibaia zeharkatu eta ordu batzuek lehenago autoa utzi dugun aparkalekura iristen gara.

Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.