Almanzor Cuchillar de las Navajas ertzetik

Capra Alpina(e)k idatzia.
557
bisita

Gredos Mendizerrako zein Sistema Central osoko mendi garaiena igotzeko beste aukera bat dugu. Ibilbidea forma borobilduko granito bloke ugariz osatua dago, oreka zaileko orratz zorrotz eta bretxa sakonekin, ikusgarritasun eta giro ezin hobea ematen diotenak. Ikuspegi ezberdin bat Gredos Zirkua disdira osoan ikusi ahal izateko.

 

Goizeko 8:00h-tan Plataformako aparkalekura iristen gara (1.770 m), Hoyos del Espino herritik 12 km-ra, non dagoeneko autoen etortzea garrantzitsua da. Hotz dago eta haizea indar handiz dabil eta horrek, ezin bestean, ondo babestuak ateratzea behartzen gaitu. Ibiltzen hasi gara Trocha Real izenez ezaguna den bidetik, Alfonso XIII erregearen ehizaldiak errazteko hogeigarren mendean eraikia izan zena.

Escareluelas arroiletik Prado Puerto Arroil errekatik paralelo ibiliz goaz eta sigi saga batzuen ondorioz, Llano de las Pozas ordekara iristen gara non eskuinean, Reguero Llano Aterpetxea agertzen zaigun. Minutu gutxi batzuen bueltan Pozas erreka zeharkatzen lagunduko digun hormigoizko zubi batera iristen gara, zein ingurune eder honetan lekuz kanpo aurkitzen den. Zeharkatu eta Los Barrerones gainera igotzen hasten gara.

Bidea sigi saga ugariz Los Cavadores iturrira bitarte altura irabazten doa. Iturri honetan orain urte batzuek inguruko mehatzetan lan egiten zuten mehatzariek behin eta berriz ur bila etortzen ziren. Gutxika bada ere Los Barrerones gainera iristen gara (2.160 m), non dagoeneko Gredos Zirkuko lehen gailurrak ageri zaizkigun.

Behin behatokira iristen garenean panoramika sinestezin batez gozatzen dugu, ez alferrik Gredos Mendizerrako inguru bikainetako baten aurrean aurkitzen gara. Hemendik aurrera jaitsiera nabarmen bat hasten dugu Cuenco Alto eta Altos del Morezón maldetik zehar, ezkerrera Barrerones iturria utziz eta beherago Cinco Lagunas bidegurutzea ere, Laguna Grande laku bazterrera iritsi aurretik.

Ura saihestu asmoz lakuaren eskuin bazterretik jarraitzen dugu, gure norabidearen ezker aldetik. 30 metro izango dituen tarte bat kable batez ekipatua aurkitzen dugu, uraren maila asko igotzen denean bide orkezko bezala erabiltzen dena. Poliki poliki lakuaren hego ertzera iristen gara non Elola aterpetxea edo orain gutxi Laguna Grande de Gredos bezala izendatu berri duten aterpetxea (1.950 m) eta 65 lagunentzako edukiera duena, aurkitzen den.

Jarraitu asmo dugun ibilbidea Casquerazo gailurrera igotzen da (2.437 m), Portilla de los Machos (2.382 m) lepora jaitsi eta Cuchillar de las Navajas ertzetik El Sagrao gailurrera igo (2.507 m), ondoren Portilla Bermeja lepora jaitsi (2.418 m) eta Portilla del Crampón (2.538 m) atakatik pasa eta gero, Gredos mendizerrako mendirik garaiena igo, Almanzor mendia (2.592 m). 

Hasiera batetan aterpetxe atzetik hito bidez balizatua aurkitzen dugun bidea eta Almanzor gailurrera eramango gaituena jarraitzen dugu. Hoya Antón sakonunera iritsi aurretik ezkerrera bira egiten dugu (ekialde), ur gardeneko Charca Esmeralda potzu xarmangarri ingurutik pasa ahal izateko. Behin bertan, erreka zeharkatu eta nabari eta zabal ageri zaigun kanalera bideratzen gara Portilla de los Machos lepora igo ahal izateko.

Kanalean aurkitzen ditugun blokeak direla eta igoera ez zaigu batere erraza egiten, naiz eta bidea markatzen duten hitoak jarraitzen goazen. Ala ere kanalaren eskuin aldetik igoz altuera azkar irabazten goaz, ain zuzen Cuchillar de las Navajas horma ondotik, ezkerrean Los Tres Hermanitos horratz zorrotzak nabarmentzen hasten diren bitartean.  

Kanalaren goi zatira gerturatzen garenean Portilla de los Machos lepora jarraitzen ari garen bidea eskuinean utzi eta ezker aldera zeharkatzen dugu, El Casquerazo mendiaren hormara bitarte eta bere albotik igotzen jarraitu. Behin gailur ertzera iristean beste isurialdera pasatzen gara (S) eta azken metroak gainditu ahal izateko eskuak erabiltzea behar beharrezkoa egiten zaigu, naiz zailtasun handiegirik gabe El Casquero gailurrera iristen garen (2.437 m).

Ertza hego isurialde errazetik jaisten hasi gara, hainbat bibak atzean utziz. Behin Portilla de los Machos lepoan (2.382 m) Cuchillar de las Navajas ertzera igotzen hasten gara, lehen zati honetan hego isurialdetik aurkitzen ditugun hito ugariek jarraituz, ez bai da batere erraza granito bloke nahaspila honetan nabigatu ahal izatea. 

Ertzaren gandorretik nabigatzen goaz, hego isurialdetik gehienetan naiz eta gutxi batzutan Laguna Grande isurialdera azaltzen garen, askoz ere eirezko eta bertikalagoa, non amildegira dugun esposizio itzelak arreta gehiago jartzea eskatzen digun. Ertza etengabeko gora-behera da eta hogeita hamar minutu eta gero, El Sagrao mendiaren oinpera eramaten gaitu.

Azken zati estu eta airezko batek, bertigoa jasaten dutenentzat inolaz ere ez gomendagarria, ataka txiki batera eramaten gaitu. Behin beste isurialdean kanal estu batetik igotzea besterik ez dugu, non berriz ere eskuak erabiltzea beharrezko dugun, azken metroak gainditu eta Cuchillar de las Navajas-ko punturik garaienera iristeko, El Sagrazo tontorra (2.507 m). Almanzor mendira dugun ikusmena, Gredos Mendizerrako sabaia, naiz duen igo bide arruntera, ezin hobea da.

Igo garen leku berdinetik jaisten gara Portilla Bermeja lepora iristea lortuz (2.418 m), non Almanzor mendira igotzeko bide arruntakin bat egiten dugun. Granito bloke handi artetik altura irabazten hasten gara ertz zabaletik igoz, bidea nabarmendu asmoz aurkitzen ditugun hitoak jarraituz haitzarte txiki batera iristen gara, non beste isurialdera zeharkatzeko aukera dugun. 

Behin beste aldean, hego isurialdetik berantz ezker aldera jarraitzen dugu Cuerno de Almanzor (2.538 m) norabidean. Jaitsiera delikatu bat, bi metroko horma salto eginez bibak baten barruan bukatzen denak, Canales Oscuras gunearen gain eramaten gaitu. Portilla del Crampón lepora igotzen gara (2.538 m), non bertatik Tejera Arroila menderatzen dugun.

Horizontalki ibiliz jarraitzen dugu Almanzor hego-mendebalde aurpegi aurrean parez pare aurkitu arte. Jendea azken tximiniaren oinpean pilatzen da, arroka leuneko lehen horma batera (II) eramango gaituen malda batzuk igo aurretik eta ondoren bigarren batera, askoz ere tenteagoa baina helduleku onekin (II+), zein behin gainditu ostean, tontor arroka eta granito bloke handi baten artean aurkitzen den pasarte estu batera eramaten gaituen. 

Ordeka txiki batera ateratzen gara, Almanzor tontorretik apenas metro gutxira. Laster batetan Gredos mendizerra eta Sistema Central guziko tontorrik garaienean gaude, Almanzor (2.592 m). Erpin geodesiko batez hornitua aurkitzen den gailurra oso estua da eta apenas bi edo hiru persona sartzen dira eta txanda eskatu beharra dago bertara iritsi eta oiko argazkia atera ahal izateko. Parez pare Almanzor tontor bikia dugu, Ipar Almanzor (2.590 m), zein tontor nagusiaren kontra hau utsik agertzen da, bertara oso jende gutxi joaten bai da.

Jaitsiera Portilla del Crampón ataka eta mendebaldeko korridore deskonposatutik egiten dugu Hoya Antón bitarte, ondoren Elola aterpetxera iristeko. Laguna Grande lakua eskuin ertzetik inguratzen dugu, ezkerrean Gargantón norabidean doan Trocha Real bidea utzi arte eta jarraian Morezón maldatik igoz, Barrerones lepora iritsi. Hemendik aurrera jaitsi besterik ez dugu, lehenbizi Llano de las Pozas lautadara eta Escareluelas arroiletik Plataforma aparkalekura, non ordu batzuek lehenago kotxea utzi dugun.

Datu teknikoak

  • Ibilbidea: Almanzor Cuchillar de las Navajas-tik
  • Luzera:18.289 m.
  • Desnibela:1.572 m.
  • Kokapena:Bestelakoak
  • Kategoria : Oinezko igoera
  • Zailtasuna:PD-
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:4:50 h
  • Nola iritsi:Plataformako aparkalekutik (1.770 m), Hoyos del Espino herritik 12 km-ra
  • Igotzeko denbora:7:20 h
  • Jeisteko denbora:2:30 h
  • Ezaugarriak:Ibilbidea forma borobilduko granito bloke ugariz osatua dago, oreka zaileko orratz zorrotz eta bretxa sakonekin, ikusgarritasun eta giro ezin hobea ematen diotenak.
  • Materiala:Makilak
  • Garaia: Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.