Mont Blanc - Laumilakoen bidetik

Capra Alpina(e)k idatzia.
416
bisita

4.807 m dituen Mont Blanc edo Monte Bianco, orain urte gutxirarte Europa-ko mendirik garaienetzat hartzen zen. Gaur egun garaienetako bat bada ere Errusian eta Georgian dauden mendi batzuek garaitu dute, ala nola Elbrus mendiak bere 5.642 m-kin. Igo ahal izateko laumilakoa deritzan ibilbidea aukeratu dugu. Betidanik eskalatu nahi izan dugun bidea izan da, bai duen desnibelagatik (1.960 m), bai duen luzera eta ikusgarritasunagatik, bainan arazoak tarteko, batez ere bidearen egoera kaxkarra, orain arte egiterik izan ez duguna. Oraingo honetan badirudi egiteko aukera dugula eta saiatzeko asmoa dugu.

Autoz 12:00h egin eta gero, azkenean Chamonix herrira iritsi gara. Goizeko 2:30h dira eta hilerri ondoko aparkalekuan autoa gelditu eta ordu gutxi batzuek lo egin asmoz lurrean etzan gara. Goizean Aiguille du Midi-ra teleferikoz igo asmoz txartelak ateratzen ditugu, Cosmiques aterpetxera (3.613 m) gerturatu asmoz, bertan erreserba egina bai dugu. Teleferiko lehen bidaia hartzea komeni izaten da (7:00h), zeren egiten ez bada, seguruenik itxaron egin beharko dugu turista ugari igotzen da eta hauek alpinistei lekua kentzen bai digute. 

Behin Aiguille du Midi ego pitoiean aurkitzen diren tuneletan prestatu eta Vallée Blanche sakanera jaisten den ekialde ertz zorrotz eta arriskutsura ateratzen gara (3.670 m). Aterpetxera iritsi eta zerbait egin asmoz, afaldu aurretik Cosmiques ertza (AD+) eskalatzea erabaki dugu. 

Goizeko 1:45h dira eta aterpetxean jendearen joan etorria etengabea da, inork ez du ateratzen azkena izan nahi eta jangelan gosaria lehenbailehen irentsi asmoz denak pilatzen gara. Gutxika gutxika Col du Midi-ra (3.532 m) jendea jaisten hasi da eta suge argitsu bat bailitzan Valle Blanco glaziarrean zehar Mont Blanc du Tacul lehen malden bila sigi-saga eginez mogitzen doa.

Zerua erabat izarreztatua aurkitzen da eta ez du hotz handiegirik egiten eta laster aldapa gora berotzen hasten gara. Ordu erdi geroago eta pitzadura handi baten ondorioz (rimaya), berriz ere denak elkartzen gara. Gainditu ahal izateko 15 m-ko eskilara bat jarria dago eta banan bana igotzea behartuak gaudenez, berriz ere martxa geldotzen da.

30´ itxaron eta gero gure txanda iritsi da eta berriro martxan jartzeko aukera dugu, eskerrak izoztuak bai geunden. Bidean agertzen zaizkigun pitzadurak saihestuz igoerarekin jarraitzen dugu. 3:00h ondoren Épaule du Mont Blanc du Tacul-era iristen gara (4.035 m) eta denak Mont Maudit lepora jarraitzen badute ere (4.345 m), guk ezkerrera biratzen dugu (ekialde) bizkar zabal bat zeharkatu asmoz eta Mont Blanc du Tacul tontor txiki bezain harritsura iristeko 3:23h (4.248 m).

Tontorra igo ondoren, Épaule du Mont Blanc-era itzultzen gara ibilbidearekin jarraitu ahal izateko. Egunsenti ikusgarri batek aho bete uzten digu. Hegoalderantz Col du Mont Maudit-ko (4.035 m) aran handi elurtura norabidean jaisten gara, ondoren ipar maldetatik berriz ere Col du Mont Maudit bidean altuera irabazi asmoz. Gune honetan serak eta pitzadurak beldurgarri ageri dira eta tentu handia jarri beharrean gara irentsiak ez izateko.

Serak batzuen azpitik pasatzean maldak desnibela handitzen du, ibilbidearen tarterik tente eta zailenean aurkitzen gara. 100 m eta 60º-ko desnibela duen malda eta eskalada segurtatzeko soka tinkoz babestua aurkitzen dena. Gune honetan jendea berriz ere pilatu ohi da eta martxa geldotu; eskerrak gu Tacul tontorrera igo garen eta iristerako, pasartean apenas bi kordada gelditzen dira.

Kostata bainan malda bertikala igotzen saiatzen gara, naiz aurretik doazen bi kordadak, trakets eta esperientzi gutxikoak, izotz puskak etengabe botatzen dizkuguten. Behin koska igo eta Mont Maudit tontorra irabazi asmotan itsu-itsu goaz. Ibilbidearen ezjakintasunak norabidean erratzen gaitu eta ertz harritsua zuzenean erasotzea eraman, baina gure erabakia ez da zuzena eta konturatu garenerako arazotan sartuak gaude. Ezinbestean zeharkaldi arriskutsu bat egin beharrean gaude, tartean bi izotz torloju jarriz, berriz ere utzi behar ez genuen bidera itzuli ahal izateko. 

Behin Col du Mont Maudit lepora iristean (4.315 m) ezkerrera biratu (ekialde) eta 45º-ko malda tente eta gogor bat igotzen saiatzen gara, Mont Maudit gailur zorrotz eta harritsura zuzenean iristeko (4.465 m), 7:05h. Minutu batzuek bertan ematen ditugu ingurune ikusgarriaz gozatzen, Peuterey ertza, Innominata ertza, Brouillard ertza, Capucin Handia, Mont Blanc du Tacul,... eta parez pare Alpeetako mendi garaienaren kupula disdiratsua, Mont Blanc. 

Hego norabidean Col de la Brenva-ra jaisten gara 4.303 m, azken 500 m-ko desnibelei aurre egin ahal izateko. Hego norabidean jarraitzen dugu lehen malda bat igotzeko, Mur de la Côte (4.485 m), non altueraren eragina antza ematen hasi eta gure ibilia moteltzen den.

Ordeka txiki bat zeharkatzen dugu (hego-hego-mendebalde) eta sigi-saga segida batzuetatik ipar-mendebalde ertza igo, atzean behe Rochers Rouges eta ondoren goi Rochers Rouges utziz eta dagoeneko inongo zailtasunik gabe, Petit Mulets (4.690 m) ingurutik pasaz, Mont Blanc tontor zuri eta borobildura iritsi (4.807 m), 10:12h. Nekatuak gaude bainan oso pozik ezer falta ez zaion ibilbide ikusgarri hau egiterik izan dugulako. Alpeetako tontorrik garaienak eskaintzen digun balkoitik gozatu eta argazki batzuek atera ondoren, jaisteko prest gaude.

Tontorretik jaitsi ahal izateko hasiera batetan Bosses ertza mendebaldera eta ondoren ipar-mendebaldera jarraitzen dugu, nagusiki italiar isurialdetik joanez, Abrigo Vallot (4.362 m) oinpera iristea lortu arte. Ondoren ipar-mendebalde norabidrean Dòme lepora jaisten gara (4.250 m) eta jarraian, ezkerraldetik (mendebalde) hasieran eta ondoren Aiguille de Gôuter norabidean jarraitu (ipar-mendebalde), non pitzadurak aurkitzen ditugun. Gôuter aterpetxea (3.782 m) ertzaren behe aldean ikus dezakegu eta non 12:22h eta gero, gure gaurko ibilaldi ikusgarria bukatutzat ematen dugu.

Datu teknikoak

  • Ibilbidea: Mont Blanc Laumilakoen ibilbidea
  • Igoera data:2018-08-12
  • Luzera:13.800 m.
  • Desnibela:1.960 m.
  • Kokapena:Alpeak
  • Kategoriak : Izotz eskalada, Kranpoiak, Mixtoa
  • Zailtasuna:PD+
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:10:12 h
  • Nola iritsi:Aiguille du Midi-ko teleferikoan du bere hasiera, 3.775 m.
  • Igotzeko denbora:12:22 h
  • Jeisteko denbora:2:10 h
  • Ezaugarriak:Midi lepotik desnibel garrantzitsua, naiz teleferikoak eta Cosmiques aterpetxe berriak laguntzen duten.
  • Materiala:Soka, kaskoa, arnesa, Torloju batzuek, pioleta,...
  • Egoera:Elurraren baldintzak egonkortu beharko dira ibilbidea hasi aurretik. Ala eta guztiz pasarte delikatuak Mont Blanc du Tacul eta Mont Maudit lepoan Rimayak. Mont Maudit eta gero ihes egiteko zailtasunak.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.