Taillón Ipar Aurpegi Klasikoa - AD+

Capra Alpina(e)k idatzia.
2259
bisita

Taillon edozein mendizaleentzako hirumilako mendietan eskuragarrienetako bat dugu, ipar aurpegi beldurgarria salbuespen. Taillonen edertasuna eta bereiziki bere ipar aurpegiarena, piramide itxura eta neurri izugarrian datza. Maiatza bitarte, bere elur eskaladak 700 m desnibeleko ibilbide paregabe bat eskaintzen digu, aldaparen malda 50º/55º bataz bestekoa izanik, naiz pasarte batzuek 70º-ra iritsi bai daitezke, pirineoko eskalada klasikoenetako bat eginez. 

Gavarnie herri politera gerturatu gara, Gavarnie zirku ikusgarriaren sarrera, naturak sortu duen gauza harrigarrienetarikoa, 1.500 m desnibeleko paret bertikalez urbildua eta Europan bigarren altuena den 423 m-ko kaskada zirraragarria aurkitzen dena. Eguzkia izkutatu aurretik eta denborarik galdu gabe, Col Tentes aparkalekura igotzen gara, aurrez aurre piramide izugarria ikusi ahal izateko, zein benetan kikildu eta zirrara sortzen duena, ibilbidea buruz ikasi ahal izateko.

Gavarniera itzuliz Les Cascades jatetxean esertzen gara, Swan corridore ikusgarriaren parez pare, dotorea benetan eta oroitzapen onak ekartzen dizkiguna, ez alferrik gure lehen korridore garrantzitsua izan bai zen. Afari goxo bat dastatzen dugu La Grange de Holle aterpetxera lotara joan aurretik.

Iratzargailuak goizeko 4-tan jo du eta naiz lo askorik ez dugun egin, jaiki eta jantzi ondoren, jangelara jaitsi eta aterpetxeko zaindariak utzi digun ur beroz beteriko termoa, esne eta kafe hautsa, zeren gurina, mermelada eta ogiarekin gosaltzera. Denbora askorik galdu gabe, azkar batetan dena jaso eta Col Tentes aparkalekura igotzen gara, bertan auto eta furgoneta ugari aurkituz. Badirudi gaur ibilbidea jendetsu izango dela eta horregatik lehenak izan nahi dugu bertan sartzen.

Iragarpenak kontrakoa esan arren, gauez zerua estalia egon da eta ez dirudi altsatzeko asmorik duenik. Ez du hotz handiegirik egiten eta horrek kezkatzen gaitu, batez ere elurraren egoerangatik. Goizeko 5:30h inguru Bujaruelo Portura norabidean ibiltzen hasi gara eta behin bertan, kranpoiak janzten ditugu. Bujaruelo aranetik igo diren hiru mendigoizaleekin elkartu eta nora doazen galdetzen diegu. Quintana Korridorea eskalatzeko asmotan doaz, beraz, hauek ez dira oztopo izango ipar aurpegian.

Hormaren oinpera iristean egunsentiak harrapatu digu eta Piméné mendiaren gainetik atera nahiean dabiltzan eguzki izpiek, laino geruza ezin zulaturik dabiltza. 7:00h inguru eta behin sokaz lotu ondoren, Korridorearen eskalada hasten dugu.

Korridoreak hasiera honetan eskuinetik ezkerrerako norabidea jarraitzen du eta inklinazioaren bataz bestekoa, lehen momentutik 50º/55º da. Korridorearen luzera kontutan izanik eta ahalik eta azkarren igo asmoz, ensanblen joateateko erabakia dugu eta ez luzeak eginez, hau egin ezkero denbora asko beharko bai genukeen.

Elurra egoera onean aurkitzen da eta bide guzian horrela mantenduko balitz, azkar igotzen lagunduko liguke. Aurrez igo den kordada baten arrastoak aurkitzen ditugu, baina alde batetik bestera harriak bila doaz eta horrek, luzeak egiten igo direla garbi adierazten digu. Guk berriz, hasierako erabakia aldatzeko arrazoirik ez dugu.

Inongo segururik sartu beharrik izan gabe ensanblen jarraitzen dugu. Zeruak itxuraz ez du garbitzeko asmorik eta tarteka ostarteren bat agertzen bazaigu ere, ikuskizunez gozatzeko aukerarik ez dugu eta ikusten dugun bakarra, korridorearen beheko zatia da eta hau, bakoitzetan urrunago ageri zaigu.

1:30h eta 400 m-ko etengabeko igoera ondoren, bikiei atseden emateko erlaitz bakar bat ere aurkitu ez dugularik, horma mozten duen irtengune harritsura inguratu gara. 20 m lehenago ezkerrera aurkitzen den harri batetan bilkura egin ahal izateko 3 pitoi aurkitzen ditugu eta horrela, eskaladaren pauso zailena segurtatzeko aukera dugu. Irtengunea gainditu ahal izateko luze bat egin behar dugula zalantzarik ez dugu.

Irtengunearen azpian pitoi bat aurkitzen dugu, non bertikaleena den lehen pasarteko zatia segurtatzeko erabiltzen dugun. Pioletak izotzean tinko sartu, kranpoi puntek arroka zirrizkuetan finkatu eta asko pentxatu gabe, besoetatik tiratu zatirik bertikaleena gainditu asmoz (bi metro), diedro izoztu eta etzanago batera iristeko.

Zatirik teknikoena gainditu ostean, beste elur malda segida batzuek zuzenean estugune batera  garamatzate eta gauden lekutik begiratuta, ezinbestean bigarren irtegune batera eramaten gaituela dirudi. Momentu batean nahastu ote garen zalantza dugu, baina oin arrastoak berriz ere ikusteak lasaitu egiten gaitu.

Hormara gerturatzen goazen heinean, irtenbide aukera bat ikusten hasi gara eta bere parera iristean, bideak ezkerrera biratzen duela konturatu gara eta elur malda estu batetik irtengunearen paralelo mehartua igotzen da. Hormaren tarte honetan epenas ikusmena metro batzuetara mugatzen da eta haizeak ere gogor astintzen du.

Estugunetik atera bezain laster eta dagoeneko irtegunearen gainetik, zati misto batetan barneratu eta arroka artetik sigi-saga eginez saihesten saiatzen gara, beti ere igotzeko edozein elur izpiz bilatuz. Altimetroak 3.000 m goitik markatzen du eta naiz ikuspena oso mugatua izan, bukaera oso gertu dugula sumatzen dugu.

Gutxika bada ere gune mistoa ezkerrean ditugun kanal txiki batzuetatik gainditzen saiatzen gara, batzuek oso bertikalak (60º), non arreta handiz ibili behar dugun.

Bi isurialdera erorketa duen ertz zorrotz batera ateratzen gara, non azkenik zutik ibiltzeko aukera dugun. Ikuspen faltak kokapena galdu arazten digu eta naiz altimetroak 3.100 m goitik markatzen duen, bukaera ez dugu ikusten. Ezkerrera gehiegi desbideratu ez garela espero dugu.

Irteerara iristen ari ginela pentxatzen genuenean, parez pare malda berri bat ageri zaigu eta inklinazioa berriz ere handitzen da. Ikusigabe ibiltzeak hau dakar, erreferentzi falta eta inoiz bukatzen ez den sensazioa. Malda iraunkorra da baina guk ez dugu etsitzen eta konturatzen garenerako, tontor inguruko gune etzanean aurkitzen gara, dagoeneko Ipar Hormatik kanpo. 2:30h iraun duen igoera gogor baten ondoren, gure helburua lortu dugu.

Eskuinera 100 m etzan geratzen zaizkigu Taillon gailurrera iristeko (3.144 m). Pena handia lainoak gailurretik dauden bista paregabeak ez ikusten uztea, Marbore, Torre, Casco, Cilindro de Marbore, Monte Perdido, Añisclo, Punta de las Olas, Vignemale mendigune ikusgarria, Infiernos, Gran Facha, Balaitous, Frondiellas, Garmo Negro eta askoz urrunago Midi d´Ossau.

Lainoak desagertzeko keinu bakarren bat egin ba du ere, azkar batetan berriz ere dena estaltzen du. Bistez gozatzeko aukerarik ez dugunez, fruitu leortuak eta txokolate beltz ontza batzuek jan eta Gabieto glaziarretik behera jaisten hasi gara, naiz Bretxatik jaistea baino arriskutxuagoa den, askoz ere laburragoa da.

Jaitsieraren lehen zatia arriskutsu xamarra da eta ori dela eta, arreta handiz ibili behar dugu. Quintana Korridorearen parera iristean, hiru eskalatzaile arazoetan ikusten ditugu. Korridorearen eskalada alde batera utzi eta erretiroan doaz. Segurtasunik ez zaie ikusten eta laguntzarik beharko balute adi mantentzen gara.

11:30h inguru Bujaruelo Portu ingurura ailegatzen gara eta bertatik, eskalatu berri dugun Ipar Aurpegi zirraragarria berriz ere ikusten dugu. Eguraldiak ez du aldatu eta lainoak hormaren zati handiena estalia dauka. A zer pena.

Hemen uzten dizuegu horma ikusgarri honetan jarraitu dugun eskalada bidea. Kontutan izan baldintza onak badira zailtasun handiegirik ez duela, baina dituen 700 m desnibelak eta 50º/55º-ko bataz bestekoak, konpromezu handia, esfortzu itzela eta baldintza fisiko onak izatea eskatzen duela. Atseden lekurik ez du eta erretiratu behar izan ezkero, oso konplexua izango litzateke. Tamaina honetako horma batetan gauzak bat batean okertu daitezke eta oituta ez ba gaude eta esperientzi falta badugu, ondorioak oso larriak izan daitezke.

Datu teknikoak

  • Ibilbidea: Taillon Ipar aurpegia
  • Igoera data:2017-05-11
  • Luzera:7.550 m.
  • Desnibela:700 m.
  • Kokapena:Pirinioak
  • Kategoriak : Ipar aurpegia, Korridorea, Kranpoiak, Mixtoa, Oinezko igoera
  • Zailtasuna:AD+ (III-ko luze bat)
  • Harri eskaladaren zailtasuna:III
  • Korridorearen graduazioa:55º
  • Eskalada mixtoaren zailtasuna:M3
  • Luze kopurua:1
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:2:30 h
  • Nola iritsi:Col de Tentes-etik.
  • Igotzeko denbora:6:30 h
  • Jeisteko denbora:2:00 h
  • Ezaugarriak:55º-ko malda duen horma luzea, erdiparean erresalte mixto bat duelarik. Kanala nabarmen jarraitu daiteke, amaieran ezkerretara hartuz.
  • Materiala:60m-ko soka, bi estaka, bi torloju, alien semaforoa, bagak, kranpoiak eta bi piolet.
  • Egoera:Elur egonkorrarekin, elurra izoztu delarik gauean.
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.