Yanapaccha (Cordillera Blanca) - 5.460 m

Capra Alpina(e)k idatzia.
990
bisita

Yanapaccha mendia Ancash eskualdean kokatzen da (Mendikate Zuria-Perú) eta Huandoy mendigunearen zati dugu. Llanganuco bailarako azken zatian aurkitzen da eta mendi ikusgarriez inguratua dagoenez, Huascarán, Chopicalqui, Chacraraju, Huandoy, Pisco, denak ere bera baina garaiagoak eta ori dela eta, askoz ere gutxiago bisitatua izaten da. Pitzadura sakon eta ugari dituen glaziarrak, ipar-mendebalde ertzera igotzeko izotzezko eskalada luze eta zailak eta 65º-ko azken malda tente batek, igoera zailtasun ertainekoa bihurtzen dute (AD). Quechua hizkuntzako hitz honen itzulpena Yana=beltz eta Paccha=ur-jauzi izango litzateke, beraz ur-jauzi beltz aurrean izango ginateke.

Llanganuco bailaran aurkitzen gara, leku ikusgarria benetan, erabat txiki senti arazten diguten mendi garai izugarriez inguratuak. Portachuelo de Llanganukora igotzen den bidea 42 km-an bertan behera utzi eta astoak bai ginen, zama bizkarreratu eta Yanapaccha glaziar morrenara bideratzen den bidexka hartzen dugu, bertan laku txiki baten ondoan oinarrizko kanpalekua aurkitzen bai da 4.800 m-ra (1:30h).

Apenas ordu gutxi batzuek lo egin ditugu eta iratzargailuak berriz ere jo du. Gau erdia pasa berri da eta tenperatura oso baxua denez, arropa ugari jantzi eta txokolate gaileta bakar batzuek gosaltzeko jan eta bideari ekiten diogu. Kanpalekuan gure inguruan lo egin duten kordada guziak dagoeneko atera dira, baina egia esan ez digu axolarik. Glaziarra parez pare eramanez bloke handien artetik gorantz goaz, izotzean sartu aurretik ahalik eta altuera gehien irabazi nahi bai dugu. 

Yanapaccha oinarrizko kanpalekutik

Behin kranpoiak eta arnesa jantzi eta sokaz lotu ondoren, pioletak eskuetan hartu eta apenas glaziar zati txiki bat ikusten uzten diguten frontalen argiez lagundurik, lehen izotz hormak eskalatzen ditugu. Lehen zati hau zeharkatzea oso zail egiten zaigu, pauso bat ematen dugun bakoitzean izotzak karraskatu egiten du eta gau ilunean bidea bilatzea ez zaigu batere erraza egiten eta itzulerakoan, egun argiz, duen arriskua bere neurrian balioztatzen dugu. Gezurra badirudi ere, labirinto honetatik gabez eta biderik ezagutu gabe ibili izanak zirrara sortzen digu.

Behin gune kaotiko hau atzean uztean, glaziarra asko leuntzen da eta gainditzeko errazago diren  pitzadura zabal bezain sakon zelaiak aurkitzen ditugu. Egunsentiak lehen eguzki printzak dakartza eta hotza handitzen doa, zerua lainotzen doan bitartean. Ez dirudi gaur eguraldiekin zorte handiegirik izango dugunik.

Mendebalde ertzera gerturatzen goazen neurrian aldapa maila handitzen doa eta bakoitzean tenteago jartzen hasi da. Naiz aurreko egunetan aklimatazio ona lortu dugun, 5.000 m-tan ibiltzeak ahalegin berezia eskatzen du. 

Laino artean horma baten oinpera iritsi gara, mendebalde ertzera igo ahal izateko oztopo zailena dena. Bidea erabat jendez gainezka dago, ez alferrik aurrez atera diren kordada guziekin elkartu bai gara eta iristen azkenak izan garenez, gure txanda itxarotea behartuak gaude.

Orain arte ensanblen igo bagara ere, luze hau igo ahal izateko aseguratzea behartuak gaude. Lehen 15 m-ak oso ere bertikalak dira eta bere eskalada oso zaila suertatzen da. Bi torlojuk bilkura bitarte luzea babesten laguntzen digute, bertan bi estaka aurkitzen ditugularik. 

Behin horma gaindituta eta aldi berean bide guziko zatirik zailena, gailurrera eramango gaituen ertzaren gainean kokatzen gara. Lainoen hutsegite batez baliatuz eguzkia momentu batetan agertzen zaigu eta 65º-ko bataz bestekoa duen ertzaren ikusgarritasuna ikusteko aukera dugu.

Minutu batzuen ondoren lainoak berriz ere ingurune guzia estaltzen du eta eguzkia erabat desagertzen zaigu. Ikuspena oso murritza da eta naiz aurrera egitea asko kostatzen zaigun, tontorrera iristeko irrika ez dugu galdu. Pitzadura beldurgarri batez babestua dagoen irtengune berri batera iritsi gara, aseguratu ahal izateko zaila dena, eta behin gainditzea lortuz zuzenean Yanapaccha gailurrera eramaten gaituena 5.460 m.

Penagarria lainoak talaia ikusgarri honetatik ikusi daitekeen ikuskizun aparta galaraztea, ala nola Chopicalqui, Huascarán Hego, Huascarán Ipar, Huandoy, Pisco, Chacraraju (Mendikate Zuriko 6.000-ko zailenetako bat … Beste batetan izan beharko. Haizea indarrez dabil eta hotza handia da, horregatik lehenbailehen igo garen bide berberetik jaistea erabaki dugu. Bi rappelek jaitsiera errazten laguntzen digute. 

Mendebalde ertzaren oinpean dauden serak handi batzuen azpitik altuera galtzen jarraitzen dugu. 

Gutxika bada ere lainoa atzean uzten ari gara eta glaziarraren handitasuna ikusten hasi.

Izotz horma batzuek jaitsiz, glaziarretik atera eta morrenara iristea lortzen dugu.

Datu teknikoak

  • Ibilbidea: Yanapaccha Mendebaldeko aurpegitik
  • Igoera data:2016-08-19
  • Luzera:4.500 m.
  • Desnibela:1.860 m.
  • Kokapena:Andeak
  • Kategoriak : Izotz eskalada, Kranpoiak, Oinezko igoera
  • Zailtasuna:D
  • Korridorearen graduazioa:80º
  • Izotz eskaladaren zailtasuna:WI3
  • Luze kopurua:1
  • Hasiera puntuan amaitzen da:Bai
  • Iristeko denbora:1:30 KBra
  • Nola iritsi:42 km kurbatik
  • Igotzeko denbora:4:40 tontorrera
  • Jeisteko denbora:2:30 KBra + 1h kurbara
  • Ezaugarriak:Urtearen arabera, igoerako azken luzearen zailtasuna aldatzen da PD-tik D-ra.
  • Materiala:60 metroko soka 1, 2 piolet, 2 torloju, estaka 1, kranpoiak eta kaskoa sokakideko.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.