Ishinca (Cordillera Blanca) - 5.532 m

Capra Alpina(e)k idatzia.
947
bisita

Mendikate Zuria Peru iparraldeko Áncash departamentuan aurkitzen da, Pazifiko kostaldean paralelo 180 km luzatzen delarik eta Huascarán Parke Nazional barruan kokatuz. 14 mendigunez osatua dago eta bertan 663 glaziar, 16 mendi 6.000 m goitik, beste 17 mendi 5.000 m goitik, 269-tik gora laku eta 41 ibai aurkitu ditzakegu, Huascarán bere 6.768 m-rekin mendirik garaiena izanik, Parke Nazionalari izena emanez. Ishinca mendia Chinchey mendigunean (Mendikate Zuria) aurkitzen da, aklimatazio mendi bat dugunez bisitatuenetako bat dela esan dezakegu. Naiz 5.534 m dituen, hiru mendi ikusgarrien artean dagoenez Tocllaraju (6.032 m), Ranrapalca (6.162 m) eta Palcaraju (6.274 m), oso txikiagotua azaltzen da.

 

Huaraz herritik atera gara (3.050 m), Quechua hizkuntzan “Egunsentia” esan nahi du, Áncash departamentuko hiri nagusia eta zenbatezin espedizioren abia puntu, Pashpa herrira bideratzeko. Sekulako pista harritsu batetik ordubete igaroz gero, Pashpa Cochapampa (3.400 m) herrira iritsi gara, bertan mandazaina zain dugularik. Material astun eta pisutsua (kanpin dendak, kranpoiak, pioletak, jana, eskalada materiala, sokak...) hiru astoren gainean kargatu dugu, Ishinca oinarrizko kanpalekura (4.350 m) gerturatzea askoz ere arinagoa egin zaigun.

Aurretik 12 km-ko ibilbide luze bat dugu, 5 edo 6 ordukoa irakurri dugunez, eta arratsaldeko seietako iluntzen duenez, behartuak gaude azkar ibiltzea kanpin dendak ilunpean jarri nahi ez baditugu. Ibilaldia hasi dugunetik bi ordu pasa dira eta Parke Nazionaleko kontrolera iristean, basozain arrastorik ez dago eraikina berritzen ari bai dira. Huascarán Parke Nazionalera sartu ahal izateko izena eman eta ordaindu beharra dago, egun bat 6 sol (2 €) eta 20 egun 30 sol (10 €). Bi ordu eta erdi geroago eta dagoeneko ilunabarrean , Ishinca oinarrizko kanpalekura iritsi gara eta Ishinca aterpetxe inguruan kanpalekua eraikitzen dugu(4.350 m).

Ishinca aterpetxeak ekaina eta iraila bitarte irekitzen ditu bere ateak, 60 pertsonentzako edukiera du eta hainbat zerbitzu eskaintzen ditu: taberna, jatetxe, berogailua, ur beroa eta irratia, dena den, gauzarik hoberena kudeatzen duen Italiar bikote xarmangarria da.  

Goizeko ordu-batetan iratzargailuak jo du, hotz handia dagoenez zakutik ateratzeak ere beldur ematen digu. Ordu gutxi batzuek lo egin eta berriz ere mugimenduan gaude. Hegoalde norabidean atera eta  granito bloke handiak dauden bibak gune baten inguruan, parabolt bakarren bat ere badago Boulderra praktikatzeko, ibaia zeharkatzen dugu eta ibarraren eskuinetik oso nabaria den bidea jarraitzen dugu.

Gaueko iluntasunean sigi-sagaz baliatuz altuera irabazten hasi gara, Ishinca lakura norabidean goaz Quebrada Yanarajupampan murgilduz. Urmael txiki bat atzean utzi eta behin granito bloke handi baten parera iristean, bere ezkerretik morrena igotzen jarraitzen dugu eta bat batean, Longoni aterpetxe bibaka ikusten dugu, bertan gaua pasatzeko aukerak daudelarik (5.000 m). Egia esan ona iristea ez zen gure asmoetan sartzen eta kezkatuak gaude bloke handiaren ezkerretik igotzea erabaki ona izan den.

Glaziarra eta ipar-ekialdeko ertzera doan bidea utzi (bide arrunta) eta Ishinca lakura (4.980 m) norabidean jaisten gara, non isurbide inguruan bibak kokaleku ugari aurkitzen ditugun. Zalantzak izan arren, bat batean bidea berriz ere aurkitu dugu eta lakuaren ertzetik gorantz jarraitzen dugu. Behin goiko zatira iritsi eta beste aldera jaisten hasi gara glaziar morrenara ailegatu bitarte, Ranrapalca mendi zirraragarriaren oinpean, eguna astearekin batera.

Lau ordu ibili ondoren, dagoeneko 5.200 m goitik aurkitzen gara eta itxuraz, gure gorputzek badirudi altuerara ondo egokitzen ari direla. Behin glaziar ertzera iritsi eta kranpoiak jantzi eta sokaz lotzeko ordua iritsi da. Glaziarra zeharkatzean izotzak oinpean karraskatzen digu eta erne manten arazi, aldi berean Ranrapalca horma zirraragarritik etengabe erortzen diren arrokak ateratzen duten danbateko beldurgarriak entzuten ditugun bitartean.

Glaziar lehen zati honetan hamaika “penitente” artean aurrera egin beharrean gara. Penitenteak elur eta izotzez osatuak daude eta 4.000 m-tik gorako gunetan sortzen dira, horri fin itsura dute eta beti eguzki norabidea bilatzen dute. Udaberria aurrera doan heinean ikusgai izaten dira eta zentimetro gutxi batzuetatik bost metroko altuera bitarte neurtu dezakete.

Bigarren zatian eta behin penitente gunea atzean utzi eta gero, malda leun batetik altuera irabazten goaz eta naiz aldapa handirik ez duen, oxigeno falta nabaritzen hasi gara. Geldialdiak maizago egiten ditugu eta igotze erritmoa nabari moteldu dugu.

Poliki-poliki 20 m eta 60º inklinazioa duen horma baten oinpera gerturatu gara eta zaila ez dirudien arren, arreta prestatu behar diogu azken zatian pitzadura bat bai dauka eta oso irekia badago, salto egitea oso zail suertatu daitekeelako. 5.500 m goitik aurkitzen gara eta gutako batzuek goi-mineko seinaleak nabaritzen hasi gara, baina gutxi falta zaigunez jarraitzea erabaki dugu.

Banan bana Ishinaca gailurrera iristen hasi gara (5.535 m), penitentez beteriko erlaitz estua eta apenas denek kokatzeko lekurik duena (6:15h). Bertatik dugun ikuskizuna harrigarria da Tocllaraju, Palcaraju, Urus, Huantsán,… eta nola ez, neurri erraldoiez kikiltzen gaituen Ranrapalca bizilaguna ere.

Minutu batzuek mendi eder honetaz gozatuz pasa dugu, aklimatazio mendi bat bezala erabilia bada ere, ezin dugu inolaz ere gutxietsi. Altuera itzela du, ibilbide luzea eta pitzaduraz beteriko glaziarra. Gure sasoi fisikoa hobetzeko ongi etorri zaigu eta horrela, beste helburu handiagoak erasotzeko ahalmena hobetu, ala nola Tocllaraju, Chopiqualqui, Yanapaccha edo Alpamayo ikusgarria, mendirik politena.

Datu teknikoak

  • Ibilbidea: Ishinca Hego-mendebaldeko ertza
  • Luzera:25.000 m.
  • Desnibela:2.033 m.
  • Kokapena:Andeak
  • Kategoriak : Kranpoiak, Oinezko igoera
  • Zailtasuna:PD-
  • Korridorearen graduazioa:60º
  • Luze kopurua:1
  • Hasiera puntuan amaitzen da:Bai
  • Iristeko denbora:4:30 h Oinarri kanpalekura+6:15 gailurrera
  • Nola iritsi:Chinchey mendigunean kokatua (Mendikate Zuria) eta Ishinca araneko azken muturrean aurkitzen dena. Pashpa Cochapampa herritik abiatu 3.400 m, Ishinca aterpetxetik pasa 4.350 m eta hego-mendebaldeko ertzetik igotzen dena.
  • Igotzeko denbora:15:30 h
  • Jeisteko denbora:4:30 h
  • Ezaugarriak:Aklimatazio mendi klasikoa baina zailtasun eta arriskurik duena. Altuera, gerturatze luze eta pitzaduraz beteriko zeharkatu beharreko glaziarrak, inolaz ere ezin ditugu gutxietxi.
  • Materiala:Kranpoiak, pioleta, soka, kaskoa eta estakaren bat
  • Garaia: Negua
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.