Chinebral de Gamueta - 2.329 m

Capra Alpina(e)k idatzia.
246
bisita

Atxerito hego mendebaldean kokatzen den Gamueta zirku karetsuko tontorrik garaiena dugu. Atxerito lepora erortzen diren horma zirraragarriek Gamueta sakanera jaisten diren malda etzan eta elur garaian txirrista egitea gonbidatzen dutenekin oso bestelakoak dira. Bide arrunta Linza aterpetxea aurkitzen den Plano de la Casa-tik ateratzen da (1.330 m).

 

Linza uharra zeharkatu eta aurrez aurre dugun bretxa nabarira bidean abiatzen gara (S). Pagadian sartu eta garai bateko xendatik gorantz goaz, kolore hori eta berdez markatua, Paso del Caballo bidean (1.410 m), bertan Linzako kirol eskalada eskola aurkitzen delarik. Kanalak, plakak eta pitzadura kareharri ezin hobean, parabolt eta kimikoz dotore hornituak.

Bretxa tamainaz xumea bada ere edertasun berezia du. Beste isurialdera metro batzuek jaitsi eta ezkerretik ezproi karetsua paraleloki jarraitzen dugu (ESE), mimosa handi baten ingurura bitarte, Gamueta baso sarreran aurkitzen dena.

Gamuetako basoa Aragoiko Pirineoko pago eta izei baso handiena kontsideratua dago. Ansó-Fago Mankomunitateko bizilagunen konpromiso zein erakundeen laguntzek ingurune pribilegiatu hau gorde dute. Ehunka urte dituzten pago artean ibiltzea oso atsegina da, non isiltasuna eta bakea, txori zein zintzarri bakarren baten tintinak bakarrik apurtzen dute.

Behin baso mugatik kanpo, muino belartsu bat gainditzen dugu (1.530 m), bertatik aterpetxe metalezko bat ikusten dugularik eta non, ezkerretik jarraitu behar dugun Paso del Oso bretxa ingurura joan ahal izateko (1.620 m). Aurrez aurre malda tente bat agertzen zaigu ekialdetik Plana de Diego (2.000 m) goi zatira bitarte igotzen dena.

Malda hasieran belartsua eta harritsua ondoren, gune etzan eta belartsu batera iristen da. Bertatik eta zeruertzean ebakita Hiru Erregeen Mahaia, Petrechema, Achertio eta Chinebral de Gamueta ikus ditzakegu. Irudi ikusgarri honek igoera luze eta gogorra laster ahaztu arazten digu.

Chinebral gailurraren ipar aldean aurkitzen den aran zintzilikatura doan xenda eta Atxerito gailurrera eramango gintuena ezkerrean (E) utzi eta eskuinean dugun malda belartsutik igotzen gara (ESE).

Maldan beste aldera Chinebral-ko lehen bretxa aurkitzen dugu, bertatik dagoeneko gailurra ikus dezakegu (1:55h). Inongo zailtasunik gabe gune harritsutik bretxa bertara jaitsi eta eskuinetik zeharkatzen dugu.

Bigarren bretxara bitarte banalerroko goi partetik igotzen jarraitzen dugu (xenda nabaria). Elurra badago iparreko isurialdera erlaitzak sortzen direnez kontu handiz ibili beharreko gunea, ez arriskatu. Bertatik gailurra oso gertu badirudi ere,  oraindik azken malda bat gainditu beharrean gara.

Minutu gutxiren bueltan Chinebral de Gamueta gailurrera iristen gara (2.312 m), itoa eta buzoa (2:10h). Eguna ikusgarria da eta inguruko mendiak ez ezik, urrunago dauden  Midi d´Ossau, Palas, Balaitous, Infiernos, Garmo Negro, Bisaurin…. ikusteko aukeran gaude. 

Ez da luzea, ez da zaila eta merezi du bertara igotzea. Goiz pasa aproposa aurrekin joan ahal izateko.

Datu teknikoak

  • Ibilbidea: Chinebral de Gamueta Linza eta Plana de Diego-tik
  • Luzera:7.000 m.
  • Desnibela:1.162 m.
  • Kokapena:Pirinioak
  • Kategoria : Oinezko igoera
  • Zailtasuna:F
  • Hasiera puntuan amaitzen da:Bai
  • Iristeko denbora:2:10 h
  • Nola iritsi:Linza aterpetxetik, Zuriza kanpinetik 5 km, Anso herritik 19 km eta Isaba herritik 20 km
  • Igotzeko denbora:3:40 h
  • Jeisteko denbora:1:30 h
  • Ezaugarriak:Hasieran baso eder bat, ondoren malda belartsuak eta azken zatian arroka
  • Materiala:Makilak
  • Egoera:Uda partean bidea oso nabarmena da. Neguan berriz kontuz elurrarekin azken zatian erlaitzak sortzen bai dira
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.