Muniako mendi-zerra

Capra Alpina(e)k idatzia.
4685
bisita

Munia-ko mendi zerra ahaztua izan da aragoa alderdian, baina konbentzituta nago inor ez dela hotz geratuko ibilbide honekin. Proposatzen dizugun igoera Troumous-eko iparraldeko isuritik doa. Baliabide guziak ditu, 3000 m. gailurrak, eskaladako pasuak I, II eta III- zailtasunekin, ertz luze eta aereoak eta elurra Munia-ko glaziarrean.

Troumouse zirkuko aparkalekutik atera gara (2100 m.) 0h, (E) Ama Birjinaren  txabola eta Lacs des Aires doan bidea jarraitu eta bertara iritsi aurretik, (SSE) norabidea segi eta gora goaz. Hormaren azpira iristen gara eta ezkerrera biratu (E) eta Deux Soeurs (bi ahizpa) ingurura goaz. Bi monolito dotore dira urrunetik ikusten direnak.

Aurrera goaz harri artean aldapa forte batetik uhar bat bilatzen dugun arte eta gurutzatu gabe bere parean joanez, harri multzoak segituz gorantz goaz. Harri hautsiko tximini bat kontrafuerte baten atzean ezkutaturik dagoena bilatu arte (ez da zirkutik ikusten) 40´(2200 m.).

Bertatik igotzen hasten gara baina arreta handiarekin, gehienetan elurra eta izotza egoten da edo elur faltak harriak azaleran uzten ditu eta oso errez erortzen dira arazoak sortuz. Igotzea lortu dugu ozta-ozta eta arnas estuka, dagoeneko goialdean gaude (2400 m.) 1h.20´. Gauden lekua igo duguna baina etzanagoa eta zabalagoa da. Eskuinera harrizko dorre bat uzten dugu eta harrikari batetik igoz ezkerretara dagoen hormara zuzendu gara. El Passet (2650 m.) 1h45´.Pareta eskalatu behar dugu (II),arroka ona du eta ekipatuta dago anklaje batekin.

Igotzen dugu eta elurrik ez dagoenez glaziarrean (normalean egoten da baina aurten ez da halakorik), kairnak segiz morrenan zehar garamatza Munia-ko lepora (2853 m.) (PD) 2h.40. Bertatik ikus ditzakegu Munia-ko lakuak Robiñera mendiaren magalean.

Gorantz segiz (E), orain ezkerretik orain eskuinetik, bide arrastoak nonahi bai daude, denak ere Paso del Gato (II) deritzan pasabidean elkartzen dira. Betidanik entzun dugu bere berri eta kezkatuta iritsi gara. Metro batzuek dituen harri tente eta leun bat da eta zeharkaldi batekin igotzen duguna daukan pitzadura batetik 3h. Munia-ko lepoko tartea niri askoz ere zailagoa suertatu zait. Igo dugu eta norabide berdinean aurrera goaz tximini batetik, eskuinetik igotzen hasi (I) eta ezkerretik bukatuko dugun bide errazago batetik, azken ertzean kokatu garelarik.

Ertza apal-apal gorantz doa bi isurialdetik, bretxa txiki batzuek saihesten ditugu eta irtenune batzuek (I) igaroz azken aldapan utzi gaituzte. Munia (3134 m.) 3h.40´. Harri multzoa.

Ertzaren norabidea jarraituz jaitsiera hasten dugu, harri hautsitik eta denbora gutxi barru Pequeña Munia (3096 m.) tontorrean gaude 4h.15´. Ibilbide leun batetik lepo batera jaitsi (3029 m.) eta bost minutu barru Sierra Morena gailurrean aurkitzen gara (3090 m.) 4h.20´. Hemen hasten da ertz guzi honen zatirik teknikoena eta zailtasun handiena duena ere. Troumouese eta Sierra Morena lepora jaitsi behar dugu eta horretarako 50 metroko pareta dugu oztopo. Zailtasuna (III-) dauka eta bi luzeetan egin daiteke horretarako dauden anklajeak aprobetxatuz (egia esan igotzeak beti ere zailtasun gehiago du). Dagoeneko denak lepora jaitsi gara arazorik gabe eta lasai arnasa artzen dugu (3035 m.) 4h.35´.

Bide deseroso eta harri hautsi asko duen bat igoz, zailtasun handiegirik gabe baina bai oso airezko, Troumouse-ko gailurrean uzten gaitu (3085 m.) 4h.50´. Ertzetik zehar jarraitzen dugu, karrusel bat bailitzan (gora eta behera) eta 3000-ko gailur txikiago batzuek iraganez, Heid gailurrera iritsi gara (3022 m.) 5h. 20´. Ibilbide errazetik goaz harri hautsi asko badago ere, beti berantz eta beste gailur bat iraganez Petit Pic Blanc (2957 m.), gure norabideak Gerbats mendira (2904 m.) garamatza igoko ez dugun arren eta ezkerretik zeharkatuko dugu. Harrikari eta belarreztatutako malda batetik goaz eguneko azken zailtasunaren bila. 100 metroko zeharkaldi bat daukagu gure aurrean eta egia esan, zirrara handia ematen du. Erlaitz estu bat (II), Troumouse-ko hormak mozten dituzten korridore arriskutsu eta airezko batzuetatik igarotzen da. A zer lasaitua espaloi baten gainean dagoen harri multzora (kairn) iristean, zeharkaldian jasandako tentsioa handia izan da. Arnasa lasai hartzea lortu dugu berriro ere eta goranzko norabidea segiz Sède-ko lepora heldu gara (2651 m.) 6h 10´.

Jaitsiera hasieran horma batetik doa bidea garbi ikusten ez delarik, baina altuera galtzen goazen neurrian garbi azalduko zaiguna. Arin goaz eta denbora gutxi barru, zirkuko beheko aldera iritsi ere eta belarreztatutako bidea segiz Lacs de Aires-era iristen gara 6h.45´. Ez dute ur askorik, glaziarrean elurrik ez egoteak bere eragin garbia du. Gure ibilbidea bukatzeko aldapa pare bat gelditzen zaizkigu eta oso handiak ez badira ere, daramagun ibilaldia kontutan izan da gogorra egiten zaigu.

Minutu batzuk geroago Troumouse-ko Ama Birjinaren aurretik goaz eta dagoeneko bide lasaiago batetik, goizean aparkalekuan utzi dugun kotxera iritsi gara.

Ez nuke bukatu nahi urik ez dagoela bide guzian esan gabe eta gure kantinplorak betetzeko azken aukera, aurreneko tximinian sartu aurretik dagoen uharrean dago eta bertatik pasa garenetik ordu asko pasa dira.Kontu handia eduki honekin.

Datu teknikoak

  • Ibilbidea: Munia Muniako mendizerra
  • Kokapena:Pirinioak
  • Kategoriak : Ertza, Oinezko igoera
  • Zailtasuna:PD+
  • Harri eskaladaren zailtasuna:III-
  • Ibilbide zirkularra:Bai
  • Hasiera puntuan amaitzen da:Bai
  • Nola iritsi:Gédre-tik (43 km. Lourdes) Héas-ko bidea jarraitu, peajea ordaindu beharreko karretera igo, Mailet ostatutik pasa eta Troumouse-ko aparkalekura iritsi (4 km. Héas-tik eta 16 km. Gédre-tik).
  • Igotzeko denbora:7h. atsedenik gabe
  • Ezaugarriak:Ibilbide teknikoa eta esperientzia dutenentzako. Normala izan daiteke Munia-ko glaziarrean elurra egotea Eskalada pasoak I, II eta III-. Sierra Morena ertzak III- rapelatzeko/aseguratzeko 2 anklaje. Bide guzian zehar urik ez dago.
  • Materiala:Pioleta, granpoiak eta soka.
  • Garaia: Uda, Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.