Gran Facha-ren zeharkaldi borobila

Capra Alpina(e)k idatzia.
4325
bisita

Xenda zaletasuna gustukoa duen edonorentzako aukera asko dituen trabesi borobila da. Ibilbidea harrigarria da hasieratik eta ur jauziak, uharrak, lakuak eta mendateak oso berezia egiten dute. Bidea hiru mila metrotik pasatzen diren mendi mitiko batzuek zeharkatzen ditu, Balaitous, Gan Facha, Frondiellas eta Picos del Infierno. Gainera, aukera dugu edozeinetara igotzeko ere.

HARRIZKO ETXE ATERPETXEA (Panticosa) 1640 m. 0h.

Gure bidea aterpetxearen atzeko aldean hasten da eta aurreneko momentutik gorantz garamatza errukirik gabe, sigi-saga batzuek eginaz. Denbora gutxi barru behatoki txiki batera iristen gara. Gure bidea jarraitzen dugu, beti ere Caldarés erreka gure eskuinean eramanez, arin eta jauzika jaisten delarik.

Estutasun batetara iristen gara eta berarekin aldapa asko gogortzen da gure ibilbidea nekeza eginez. Behin zati hau igaro eta aldapa baretzen da, zelai batetara iritsiz 30´. Gure bidea jarraituz, oso erosoa zati honetan, pixkanaka Cuesta del Fraile aldapara gerturatzen goaz 45´.

Aldapa luzea benetan eta desnibel handikoa, orregatik lasai hartu behar dugu. Minutu batzuek gero, guri oso luzeak egiten zaizkigun arren, igotzea lortzen dugu Machimaña beheko urtegiko hormaren azpira eta segituan Bachimañako aterpetxe berrira, 2012 urtean irekia (2180 m.) 1h.15´.

10´geroago Machimaña goiko urtegian gaude, oso berezia egiten duen uhartea erdian duelarik. Harri granitoko handien gainetik goaz, aldapak desnibel txikia du zati honetan baina oso deserosoa egiten da bertatik ibiltzea. Urtegiaren bukaera bidean goaz, poliki ba da ere, laku urdinetatik datorren uharra aurkitu arte eta zeharkatuz, bide gurutze baten aurkitzen gara norabide poste bat duelarik (2207 m.) 1h.50´. Bidea aurrerantz jarraituz laku urdinera eta Infiernoko lepora iritsiko ginateke eta eskuinera hartuz, Mercadau mendatera.

Hemen hasten da zailtasun gutxiko igoera bat eta desnibel handiegirik gabe Pecico-ko lakuetara eramaten gaitu. Pecico beheko lakura iristean bertatik ateratzen den uharra zeharkatzen dugu (2455 m.) eta minutu batzuek geroago Mercadau o Panticosa mendatea gainditzen dugu (2676 m.) 2h.40´.

Gure bidea jarraituz, marka txuri gorriz margoturik dagoena, hainbat kairn ere bertan daudelarik, aldapa behera ziztu bizian garamatza. Hasieran harri solte asko dago eta jaisten goazen neurrian, bidea askoz ere errazagoa egiten da. Aranaren beheko aldean gaude, malkarretatik jaisten diren hainbat uharren artean, Wallon aterpetxearen bila (1865 m.) 3h.15´. Ez da beharrezkoa bertara joatea baina merezi du gure bidetik zerbait alderatzea. CAF Tarbes, 80 ohe martxotik urrira zabalik eta 35 ohe libre beste urte sasoietan, tel. 0562926428.

Behin bertatik pasa eta gero, gure bideari berriz ere ekiten diogu aldapa bihurri batetik (o), gutxika ba da ere eta sigi-saga batzuek medio Facha-ko lakuetara eramaten gaitu 4h. Begetazioak lekua uzten dio harriari eta Facha  mendatera harri solte asko dagoen bide batetik egiten dugu gure abiadura asko motelduz. Gran Facha lepoa (2665 m.) 4h.20´.

Gogo eta indarrez ondo bagaude, Gran Facha gailurra igotzeari ekin genezake (3005 m.). Gu behintzat gaurkoan ez gaude igotzeko asmotan. Berantzako bideari ekiten diogu Facha lakuetara iritsiz (2515 m.) ezkerretik zeharkatuz. Bagoaz pixkanaka altura galduz, beti ere Facha-ko lakutik datorren uharra eskuinean eramanez. Harri solte asko dago gure bidean zaila eginez gure martxa, zutik mantentzea ere esfortzu handi bat da.

Gutxika bada ere desnibela galtzen goaz, oraingoan bidea argia eta errez egitekoa da. Azkar batean Campoplano lakura iristen gara (2140 m.) 5h. Gure bidea lakutik ateratzen den uharraren parean doa, GR11-ko arrastoak segituz. Beste bide bat dago  lakuaren ezker aldetik igarotzen dena eta bide zabal eta ondo zapaldu batetik , beste bi laku txiki zeharkatuz, Respumoso aterpetxera eramaten gaituena. Hemendik aterpetxe zaharra den Alfonso XIII ingurutik, berriz ere bi bideak elkartzen diren lekura iritsi arte.

GR11 markak segituz gorantz, Llena Cantal lakura eramaten gaitu (2445 m.). Bertara iristen gara kostata azken aldapak igoz, 6h. Lakua ezkerreko aldetik zeharkatuko dugu eta behin beste aldean, Tebarray edo Piedrafita lepora zuzenduko ditugu gure pausoak. Hasiera batean bidea erosoa eta erraza da, baina altura irabazten goazen neurrian harri hautsi asko aurkitzen dugu gure bidean, ibilaldia asko zailduaz. Azken aldapa gogorra gelditzen zaigu Tebarray edo Piedrafita lepora iristeko (2807 m.) 5h.50´.

Behin bertan eta indarrez ondo bagaude, Tebarray gailurra igo genezake 15´ (2956 m.). Gure bideak beste isuritik jarraitzen du , tximini batetik jaitsiaz (I) Tebarray lakuaren ertzeraino, ezkerretik zeharkatuko dugularik eta Infierno lepora eramaten gaituena (2721 m.) 5h. 15´.

Infierno iparraldeko pareta eta bere glaziarra, oraindik ere elurra mantentzen duena, ikusgarria da hemendik. Jaitsiera azkar bat hasi dugu, hasieran harrizko labirinto batetik eta gutxika aldatzen doana bidexka eder eta ondo zapaldutako batetik, GR11 markak dituelarik. Oztoporik gabe laku Urdinera eramaten gaituena (2380 m.) 5h.45´. Arazorik gabe pasa dugu goiko lakua eta aldapa handi batek , arriskutsu xamarra denak, beheko lakura eramaten gaitu.

Uharra segituz, harri eta harritzar handien gainetik saltoka doana, berantz goaz goizean pasa dugun bide gurutzeraino 6h. Uhara zeharkatuz, busti gabe egitea inoiz erraza izan eztena, goizean igotzeko erabili dugun bide berbera jarraituko dugu Bachimala goiko urtegira iritsiz (2207 m.), eskuinetik eta harrizko bide batetik goaz gora behera batzuek eginez, Bachimaña beheko urtegi arte (2170 m.), aterpetxe berria eraiki duten lekua.

Dagoeneko Cuesta del Fraile aldapa jaistea gelditzen zaigu, bai egin ere zailtasun handiegirik gabe goizean erabili dugun bidea jarraituz eta Panticosa-ra eramango gaituena, ez aurretik bere ur jauzi, putzu eta erreka gardenen edertasuna gozatu gabe. Gutxika ba da ere gure ibilbide bukatzen doa eta sigi-saga batzuek medio, bideak harrizko etxea aterpetxean berriro ere utziko gaitu (1640 m.) 7h.15´.

Datu teknikoak

  • Ibilbidea: Gran Facha-ren zeharkaldi borobila
  • Kokapena:Pirinioak
  • Kategoriak : Oinezko igoera, Trabesia
  • Zailtasuna:PD-
  • Ibilbide zirkularra:Bai
  • Hasiera puntuan amaitzen da:Bai
  • Nola iritsi:7 km. errepidez Panticosa-tik. Balneario de Panticosa 1636 m. Casa de Piedra aterpetxea.
  • Igotzeko denbora:7:15h. geldialdiak kontutan izan gabe.
  • Ezaugarriak:Trabesia borobila.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.