Patagonia: Ruta 1

Capra Alpina(e)k idatzia.
482
bisita

ETAPA 1: PORTERÍA LAGUNA AMARGA-MIRADOR DE LAS TORRES-CAMPAMENTO TORRES  

Torres del Paine Parke Nazionaleko sarrera batetan aurkitzen gara, Laguna Amarga sarreran zehazki. Galdera-sorta erantzun beharrean gaude, hamarreko araudia onartu eta Parkean hiru egun egoteagatik 18.000 Chile-tar peso ordaindu. Behin paperak bete eta dirua ordaindu, Las Torres Hotelera (126 m) bideratzen gara, kotxea utzi eta ibilbidea hasteko asmoz.

 

Zerua oso lainotua dago eta euri tanta batzuek bustitzen gaituzte. Jende ugari ibiltzen den pista Ascensio ibaiaren ibilgura jaisten da eta zubi eseki bat erabiliz, lehen aldiz zeharkatzen dugu.

Jarraian pista Ascensio ibaiaren eskuin bazterra gaindituz gorantz doa, ezkerrera Almirante Nieto mendia (2.670 m) uzten duen bitartean.

Sigi-saga ugariez baliatuz maldan goiko aldera iritsi gara, bertatik ibaiak zulatu duen bailara ikusgarria ikusteko aukera dugularik. Bideak berantzako norabidean jarraitzen du Almirante Nieto Mendiaren magal gordinean zehar, non harri erorketekin kontuz ibili behar dugun (kartela).

Pista nabarmenak Ascensio ibaiaren bila garamatza. Konfiantza askorik ematen ez duen egurrezko zubi bat zeharkatuz, ezker ibarrera igarotzen gara.

Azken malda batek Chileno Kanpalekura eramaten gaitu (413 m), Parke barruan kalpaldia baimendua dagoen leku bakanetako bat izanik. Dagoeneko 5 km eginak ditugu.

Denbora batez ibaiaren paralelo ibiltzen goaz, eguzkiak lainoak zulatzea lortzen duen bitartean. Beroak estu hartzen gaitu eta hezetasuna nabaria da. Hirugarren zubi batek ibaia berriz ere zeharkatzen laguntzen digu. Puntu honetan pistak goranzko jarrera berreskuratzen du.

Eskuinera Torre Kanpalekura doan bidea uzten dugu (603 m – 8,5 km) eta basoan gora jarraitu morrenara iristea lortzen dugun bitartean. Eguraldiak nabari txarrera egin du, euria hasi du, haizeak bortizki astintzen gaitu eta lainoa dena estaltzen hasi da. 

Azken aldapa hau oso gogorra egiten zaigu eta oraindik gogorragoa eguraldi trakets honekin. Sigi-saga kontaezinak, harri bloke handien artetik, azken aldapara eramaten gaituzte. Torres del Paine behatokira iristea lortu dugu (893 m – 10 km).

Penagarria bada ere lainoak, 2.800 m itsas mailatik gora dauden granitozko orratz ikusgarri hauez gozatzea galarazten digu. Laguna de las Torres, turkesa koloreko glaziar jatorria duen lakua, ingurune pribilegiatu honi xarma berezia eransten dio. Nahi ez badugu ere, hotzak eta elurrak, toki ikusgarri honetatik alde egitea behartzen digute eta igo garen bide berberetik, berantz abiatu gara.

Behin Torres Kanpalekura iristean (603 m), zuhaitz artean gure denda txikia jartzeko tokia bilatzen saiatzen gara, eguraldi txarretik lehenbailehen babestu ahal izateko.

ETAPA 2: TORRES KANPALEKUA-PORTERÍA LAGUNA AMARGA

Denda txiki barruan estu pasa dugu gaua, hotzak horretara behartu gaitu. Elurra egin ba du ere ez du gatzatu, baina hotza nabaria da. Gosaltzeko zerbait beroa prestatzen saiatu gara, baina gore-tex eskularruekin su txikia piztea ez da batere erraza. Gosaldu ostean gauzak jaso, motxila bizkarreratu eta ibiltzen hasten gara.

Lenga basoan zehar 200 m berantz eginez ibaiaren mailara jaisten gara. Egurrezko zubi bat erabiliz ibaia zeharkatzen dugu eta ezkerraldetik paralelo jarraitzen dugu.

Minutu gutxiren ostean Chileno Kanpalekura iristen gara (413 m). Zerua argiago agertzen zaigu eta hotza handia bada ere, eguzkia laino artetik atera nahian dabil. 

Zubi berri batek ibaiaren eskuinaldera zeharkatzen laguntzen digu eta xenda jarraituz, aranean zehar leporaino igotzen gara, bertatik atzera begiratuz. Dorreak erabat ilun ageri dira.

Las Torres hotelera (126 m) eramango gaituen azken maldaren jaitsiera hasten dugu. Nordenskjöld lakuaren bistak azken zati honetan lagun-bide ditugu. Jendearen joan etorria etengabea da.

Amarga Aintzirara iristean, atzera begiratu eta Torres del Paine eta Parke Nazional ikusgarriei azken agurra ematen diegu.

 

Datu teknikoak

  • Ibilbidea: Paineko Dorreen behatokia Amarga Aintziratik
  • Igoera data:2016-01-10
  • Luzera:20.000 m.
  • Desnibela:767 m.
  • Kokapena:Andeak
  • Kategoria : Oinezko igoera
  • Zailtasuna:F
  • Hasiera puntuan amaitzen da:Bai
  • Iristeko denbora:3:30 h
  • Nola iritsi:Amarga Aintzira sarrera eta Las Torres hoteletik
  • Igotzeko denbora:5:45 h
  • Jeisteko denbora:2:15 h
  • Ezaugarriak:Ibilbide luze eta ondo seinaleztatukoa. Lehen zatiak Ascensio ibaia jarraitzen du eta ondoren, lenga baso dotore batek Las Torres behatokira eramaten gaitu.
  • Materiala:Denda, zakua eta arropa ugari
  • Egoera:Udara izanagatik elurra egin dezake
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.