Patagonia - Cerro Torre-Fitz Roy

Capra Alpina(e)k idatzia.
708
bisita

ETAPA 1: EL CHALTÉN-TORRE AINTZIRA-POINCENOT KANPALEKUA

Ingurunea ezagutu asmoz trekking bat egiteko asmoa dugu, bertan aurkitzen diren bi mendi, Cerro Torre eta Fitz Roy, eskalada ikono bereizi direnak, gertutik ikusi asmoz. Urtarrileko goiz eder batetan abiatzen gara, zeru urdinpean, El Chaltén herritik ateraz eta Fitz Roy ibaiaren bidea igotzen hasiz.

 

20´bueltan lehen behatoki batetara iristen gara, ibaiaren ibilgutik oso goitik dagoena, eta Solo, Cordón Adela, Cerro Torre eta Fitz Roy mendien ikuskizun panoramiko aparta eskaintzen diguna.

Gugandik metro askoz behetik doan Ibaiaz bestalde, Margarita ur jauzia ikus dezakegu.

Mundu guziko ibilkariek oso erabilia duten baso andino patagonikotik, pistak gorantz jarraitzen du.

Ibiltzen goazen ingurunea ikusgarria da.

Gezurra badirudi ere eta naiz eta landaretza oparo eta elur iraunkorrez inguraturik egon, ur hotzeko iturririk ez dugu aurkitzen kantinplorak bete ahal izateko eta ezinbestean, ibaitik zuzenean hartu beharrean gara.

Aran itxi batera iristen gara, mendiarte bat dirudiena, urteetan zehar glaziarren izotzak higatua eta behin hauek atzera egitean, baso andino patagonoko landaretza oparoak bereganatua. Bertatik ikusten dugun Cerro Torre mendiaren irudiak hitzik gabe uzten digu.

Xendak gure eskuinetik baso itxitik barrena jarraitzen du, glaziar morrenaren oinpean uzten digun arte.  

Behin gaindituz gero De Agostini kanpalekura iristen gara, kanpaldia onartua dagoen leku bakanetako bat , egurrak eta harriak mugitzen ez diren bitartean eta zarata saihestu. 

Kanpalditik gertu ibaia zeharkatzen lagundu eta Glaziar Handira iristeko, tirolina bat antolatua dago, Laguna Torre isurbide inguruan.

Glaziar morrenatik igoaz Maestri behatokira iristen gara, bertatik Cordon Cerro Torre eta Torre Aintzira ikusgarri azaltzen dira.

Aran txiki hasierara berriz ere itzuliz eta behin atzean uztea lortuz, ezkerrean (N) aurkitzen dugun xendak, sigi-saga ugariez baliatuz, Alaba Aintzira ingurura eramaten gaitu.

Aurrerantz jarraitzen dugu Ama Aintzira parez pare eramanez, bertatik Fitz Roy ikusten hasten garelarik, naiz laino errezel baten atzean ezkutatzen saiatu. 

Azkenik Poincenot kanpaleku handi eta jendetsura iristen gara, Fitz Roy ikusgarriaren oinpean dagoena, bertatik ilunabar harrigarria ikusteko parada dugularik.

ETAPA 2: POINCENOT KANPALEKUA-CAPRI AINTZIRA-EL CHALTÉN

Goizean goiz jaiki eta gosaldu ostean, bigarren eguneko ibilaldia hasten dugu. Denda eta motxilak Poincenot kanpalekuan utzi ditugu, itzuleran jasotzeko asmotan. Metro batzuek jaitsi eta Ibai Zuria zeharkatuz, baso barruan murgiltzen gara.

Gutxika bada ere aldaparen inklinazioa handitzen doa eta ez da zaila jendea atsedenean ikusten. Dituen 450 m-ko desnibelak, etenik gabeko gorakadak eta atseden ezak, ez dute barkatzen.

Bat batean zerumugan Fitz Roy tontorra ageri zaigu, altuera irabazten goazen seinale nabaria. Igotzen ari garen maldak atzealdean ezkutatzen duena ikusteko irrikitzen gaude.

Igoeraren azken zatira iritsi garela pentsa arren, azken malda batekin topatzen gara, ez oso nabarmena ez eta luzea, Fitz Roy-ren behatoki paregabera eramaten gaituena.

Hiruren Lakua oinpean duela zerua ukitu nahi duten orratzek osatzen duten multzoa paregabea da: Saint Exupery, Rafael Juarez, Poincenot, Fitz Roy (3.405 m), Val de Bois eta Mermoz. Gailur hauek zapaltzea lortu dituztenekin inbidia onez gogoratzen gara.

Paisai ikusgarri honetaz gozatzen denbora luzez egon ondoren, jaitsierari ekiten diogu. Berantz goazen heinean Ama eta Alaba Aintzirak ikus ditzakegu, atzo bertatik igaro ginenak, eta hauen ezkerrera Capri Aintzira, El Chaltén herrira itzuliko garen bidean dagoena.

Kanpalekua jaso, motxilak bizkarreratu eta azken begirada nostalgikoa nahitaezkoa bihurtzen da. Egia esan, mendi hauek sortu diguten zirrara oso mendi gutxik sortu digute. Duten edertasun eta dotoreziak bereizi eta paregabeak egiten dituzte.

Capri Aintzira eta bere kanpalekura iristeko ordu bete behar dugu. Bertatik oraindik ere Fitz Roy lerroa ikusgarri ageri zaigu.

Xenda baso hostotsuan zehar jaisten da eta desnibela poliki galtzen doa azken zatira iritsi bitarte, askoz ere mailatsuagoa dena. Zati honetan, Vueltas ibaira ditugun ikusmen ikusgarriaz gozatzeko aukera dugu.

Hiru orduz ibili ondoren, ibilbidearen bukaerara iritsi gara, El Chaltén herrira. Intentsitate handiko bi egun, ibilbide ikusgarri bat eta inoiz ahaztuko ez ditugun bistak. Argentinar erara erretako haragiak bukaera ezin hobea eman dio ibilbide dotore oni. 

 

Datu teknikoak

  • Ibilbidea: Cerro Torre-Fitz Roy trekking-a
  • Igoera data:2016-01-16
  • Luzera:35.000 m.
  • Desnibela:1.917 m.
  • Kokapena:Andeak
  • Kategoria : Oinezko igoera
  • Zailtasuna:F
  • Ibilbide zirkularra:Bai
  • Hasiera puntuan amaitzen da:Bai
  • Nola iritsi:El Chaltén herritik
  • Igotzeko denbora:9:10 h + 4:40 h
  • Ezaugarriak:Ibilbide luze eta zorrotza
  • Egoera:Eguraldi onez egin beharreko ibilbidea inguruneaz zein paisai ikusgarriaz gozatu ahal izateko
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.