Monte Rosa – Dufourspitze 4.634 m (PD+)

Capra Alpina(e)k idatzia.
4615
bisita

Monte Rosa gailur ugari dituen mendia da, Dufourspitze (4.634 m) izanik punturik garaiena eta Alpe mendi zerrako bigarren altuena. Bere igoera arrunta Mont Blanc-en igoera arrunta baina delikatuagoa da, batez ere azken ertzak dituen zailtasunagatik (PD+), luzea, zorrotza, arriskutsua eta arri zein izotz pasarte mistoak dituena (kranpoiak beharrezkoak). Gailurra harrapatu ahal izateko bi egun beharrezkoak izango dira, horretarako Monte Rosahütte (2.795 m) aterpetxean gaua pasatzea komeni izango da.

 

Lehen jarduna: Monte Rosahütte aterpetxe igoera. Zermatt herritik atera eta Gornergrat-a igotzen den tren kremailerak Rotenboden geltokira eramaten gaitu (2.815 m).  Trena utzi eta Riffelsee lakuaren ertzera jaisten gara, bertatik Monte Rosa glaziar ikusgarria lehen aldiz  ikustatzen dugularik. Glaziar arroaren eskuin ertzetik ekialdera jarraitzen dugu. Zerua erabat estalia dago eta euria etengabe dario. Pena lainoak bere osotasunean sekulakoa den paisai ikusgarriaz gozatzeko aukera galarazi izana. 

Bidexka nabariak Gorner glaziar ingurura eramaten gaitu. Xenda desagertu zaigu eta baliza bakar batzuek bidearen nondik norakoa markatzen digute.

Glaziarrera iritsi ahal izateko, arroa osatzen duen horma batetatik zehar jaitsi beharrean gara,  izotzaren marruskaduraz higatua eta biluztu eta gordin ageri dena, eta urtaroa kontutan izanik glaziar mailatik oso goitik dagoena. 30 m baina gehiago duten eskailera finko bezain tente batzuetatik jaisten gara eta egia esan, goitik begiratzean zirrara sorten digutenak.

Berantz jarraitzen dugu beste horma tente bat saihestuz, horretarako jarrita dauden soka finko batzuez baliatuz, izotza eta granitoa elkartzen dituen zubi batera iritsiz. Errimaia nabarmena  zeharkatu eta izotzetan oinak jartzen laguntzen diguna. 

Momentu honetatik aurrera granpoiak behar beharrezkoak dira eta soka ere ez dago soberan. Glaziarra erabat zartatua dago, baina pitzadura gehienek itxuraz oso sakonak ez ba dirudite, ardura handiarekin ibili behar dugu. Glaziarretik ibiltzeak beti ere errespetu handia eman izan digu.

Baliza bakar batzuek, estrategikoki ipiniak, pitzadura labirinto honetatik aurrerantz joaten laguntzen digu. Denbora bat daramagu alde batetik bestera pitzadurak saihestuz. Halako batetan morrenaren eskuinaldera zuzentzen gara glaziarretik ateraz. Ezkerretik soka tinkoz hornitua aurkitzen dugun granito hormatik igotzen hasten gara, desnibel handia gaindituz. 

Noizik eta behin atseden hartzeko gelditzen gara eta nola ez, glaziarrera dugun ikuskizun ikaragarriaz gozatu asmoz. Zalantzarik gabe izotz ibaia ikusgarria eta neurriz kanpokoa da.

Sigi-saga batzuez lagundurik azken zatia gainditzea lortu dugu eta aterpetxe zaharraren hondakinen ingurura iritsi, berritik metro bakan batzuetara dagoena. Azken aldapa batek zuzenean Monte Rosahütte (2.795 m) aterpetxera eramaten gaitu. 3:45h.

Eroso eta atsegina. Martxo erditik iraileko erdiraino gordea dagoena, tel. 027-9672115. 128 pertsonentzako  tokia du. Indartzeko afari on bat eta ohera atseden hartzera. Biharko jarduna oso gogorra izango da, 1.839 m-ko desnibel positiboa, azken ertz luzea, zorrotza bezain  arriskutsua. Glaziarretik eguzkipean ez pasatu asmoz goizean goiz jaiki beharrean gara, pitzadurak handitu eta elur zubiak apurtu aurretik, gure segurtasunerako arriskutsuak izan ez daitezen.

Bigarren jarduna: gailur saiakera. Iratzargailuak jo du baina ohetik ezin altxaturik gaude, goizeko 1:00h da. Behin gosaldu ondoren, motxila bizkarreratu eta frontalaren argipean gau hotzera atera gara. Haize izoztuak aurpegia jipoitu eta gorputza hotzikara batek zeharkatzen digu. Izarrez beteriko zeruak, atzoko trumoi eta ekaitza ahaztu arazi digu, eta gure lehen pausoak gidatzen ditu. Morrenaren ertzetik goaz (SSE)  itoak jarraituz (SE) serak ingurunetik  Untere Plattje (behe plataforma) iritsi bitarte. Pitzadurak etengabe saihesten goaz aldapa tente bat igoz, Obere Plattje (goi plataforma) heltzen garen bitartean, 3.200 m. Scholle izeneko ibarra igotzen jarraitzen dugu, Monte Rosagletscher glaziarretik zehar, goi-lautada izoztu bat gainditzea lortuz (Satteltole) 4.000 m. Bat batean egunsenti ikusgarriak arri eta zur uzten gaitu.

 

Matterhorn (Cervino), Dent Blanche, Obergabelhorn, Zinalrothorn, Weisshorn profilak zeru urdinean ebakitzen dira. Paisai eder hau ikusteagatik honaino igotzeak merezi du. Gure ezkerrera (E), Nordend eta Dufourspitze mendien artean, Monte Rosagletscher glaziarrak bere hasiera du eta gure eskuinera (SE) bukaezina dirudien malda tente bat ageri da eta Dufourspitze mendebaldeko ertzaren hasierara zuzenean doa.

Igoera nabarmena, batez ere azken zatian duena, ala nola gauden alturak, arazoak sortzen dizkigu eta igoera oso gogorra egiten zaigu. Behin ertzari hasiera ematen dion kontrahorma elurtua  gaindituz (NO), Punta Sattel (4.359 m) azpitik, eskaladaren azken zatian sartzen gara (4.400 m). Ertzaren ahora igotzen gara (E) eta laster batetan, lehen kota aurkitzen dugu (II, arriskutsua).

Azken gauean egin duen elurrak, aurrera egitea ez digu batere errazten. Metro batzuek destrepatzen ditugu eta elur eta arroka zati batetik jarraitzen dugu, jendarme txiki ugari dituena, tontor aurreko zati azpian dagoen lepo estu batera iritsi arte. Haizeak gogor astintzen digu eta hotza oso nabaria da. Gainera, eskularru eta granpoiekin eremu mistotik eskalatzea, arroka, izotz eta elurrez beteriko erlaitz eta zuloetatik, ez da batere erraza.

Eskuan daramaten makilak, arroka izoztu eta elurtuei heltzerakoan, ez dit batere laguntzen eta bertan bera uztea erabakitzen dut, itzuleran jasotzeko asmotan. Metro gutxiko horma bat gainditu eta ertzetik jarraitzen dugu (II+), eremu oso arriskutsu eta airezkotik, tontorraren azpiko aldera iristea lortuz.

Bretxa txiki batera destrepatu eta erlaitz batzuetatik jarraitzen dugu tontorraren azpitik. Ertzaren zatirik nagusienean gaude. Tontorrera gerturatzen goazen heinean, arroka oso leun ageri da eremua oso arriskutsua  bihurtuz.

Azkenik Dufourspitze tontor estura iritsi gara (4.634 m) 6:20h, Alpeetako bigarren garaiena. Tontorrean tramankulu ezezagun batek punturik gorenena markatzen du. Ertzean bizi izan dugun tentsioak, deskribatu ez daitekeen pozari paso ematen dio. Besarkatu eta momentuaz intentsitate handiz gozatzen dugu. Hotz eta leku faltak, behatoki ikusgarri honetan denbora asko egotea galarazten digu eta iritsi eta lasterrera, gure atzetik datozen eta iristear dauden korda-dei lekua utzi beharrean aurkitzen gara. 

Liskamm mendira ikuskizun pribilegiatua dugu 4.527 m.

Jende guzia kontrako bidetik doanez, beraien atzetik jarraitzea erabaki dugu, naiz gure asmoa etorritako bidetik itzultzea zen. Soka finko batzuez lagunduz Nordend eta Dufouspitze lepora jaisten gara.

Hemendik aurrera, Monte Rosagletscher glaziarretik jaitsiz jarraitzen dugu, Scholle ibarrera bitarte, noiz orain ordu batzuek Satteltole goi-ordeka izoztu eta etzanera desbideratu garelarik.

Puntu honetan atseden hartzen dugu. Erlaxatuta gozatu egin berri dugun igoeraz ala nola bertatik ikusteko aukera dugun ikuskizunaz ere. Ingurune ikusgarri honetan eskalatzeko aukera izan dugun hainbat igoera burura datozkigu, Matterhorn (Cervino), Zinalrothorn, Castor, Polux, Unter Aeschhorn eta beste aukera berri batzuek izango ditugunarekin amets egiten dugu.

Denbora aurrera doa eta berriz ere martxan jarri beharrean gara Monte Rosagletscher glaziarra jaitsi asmoz, ordu honetan erabat irekiak dauden pitzadurak saihestuz. Behin aterpetxean, lortu berri dugun balentriaz etengabe gozatzen dugu eta ez da gutxiagorako. 10:00 h.

 

 

 

 

Datu teknikoak

  • Ibilbidea: Monte Rosa Monte Rosahütte aterpetxetik
  • Desnibela:1.839 m.
  • Kokapena:Alpeak
  • Kategoriak : Kranpoiak, Mixtoa
  • Zailtasuna:PD+
  • Harri eskaladaren zailtasuna:II+
  • Hasiera puntuan amaitzen da:Bai
  • Nola iritsi:Tren kremailera Zermatt-en hartu eta Rotenboden (2.815 m) aterpetxeraino igo, bertatik Gorner glaziarretik zehar Monte Rosahütte aterpetxera igoz (2.795 m)
  • Igotzeko denbora:3:45 h + 6:20 h
  • Jeisteko denbora:3:40 h + 3:00 h
  • Ezaugarriak:Glaziarra luze eta oso zartatua dago eta aterpetxea oso baxu eraikia dago
  • Materiala:Pioleta, granpoiak, soka eta ertzerako zintak
  • Egoera:Glaziar ibilbide eta azken ertz arriskutsu eta airezkoa (eskalada mixtokoa)
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.