Ferbos ertza Tres Conseillers (AD+)

Capra Alpina(e)k idatzia.
1258
bisita

AD+ katalogatutako ertza dugu IV/IV+ pasabide bakanen bat duelarik. Cap de Long laku ikusgarriaren parez pare aurkitzen da, Nouvielle parke naturalean. 450 m-ko bataz besteko desnibela eta 800 m-ko luzera du, arroka ona eta III eta III+ pasarte ugariekin. Lehen igoera 1.981 urtean C.Passet, H .Brulle y R. de Monts egin zuten.

Oredon aterpetxean (1.855 m) gaua pasa ondoren Cap de Long lakuko aparkalekura abiatu gara. Presaren horma aldenik alde zeharkatu eta GR10 bidexka jarraituz eta sigi-saga ugariez baliatuz, altuera azkar batetan irabazten dugu.  Katuaren pasabidera iritsi aurretik (2.465 m), Aubert isurialdera doan GR10 bidexka eskuinera utzi eta ezkerretik Crête des Laquetes mendi hegalean goaz, Cap de Long labar gainetik. Harri bloke artetik Ramoung (3.011 m) mendiaren hormak saihesten ditugu eta Nouvielle ebaki oinpean dagoen elurtegi iraunkorrera iritsi aurretik, ezkerrera biratzen dugu Ferbos ertzera iritsi ahal izateko. 

Behin ertzaren oinpean gaudelarik, sarbidea den tximinia oso nabarmen ikus daiteke. Sokaz lotu eta eskalada ensanblen hasten dugu, tximiniako ezker hormatik gorantz (III), helduleku onak aurkitzen dugularik.

Ertzaren gaina harrapatu dugu eta tontorrera bitarte ez dugu utziko.

Zailtasun handiegirik ez du baina beti ere mantentzen da (III/III+). Ertza oso airezko eta dibertigarria suertatzen zaigu.

Benetan pasarte oso politak eta arriskutsuak daude, gure arreta osoa eskatzen dutenak.

Pasabide bereizi eta zailenera iritsi gara, IV+ ko diedroa. Urrutitik begiratuz arro agertzen zaigu eta kezka sortu, baina behin bere oinpean, ez da oso zail ikusten. Zeharkatzen duen pitzadurari esker zailtasun handiegirik gabe igotzen dugu. Pasartea finkatu ahal izateko bi friend nahikoak zaizkigu. 

Bi isurialdeek oso airezko dira eta Cap de Long ikustatzeak itxura oso bereizia ematen dio.

Bidera ateratzen zaizkigun irtengune ugariek bata bestearen atzetik gainditzen ditugu, oso ikusgarriak batzuek, eta abentura ukitu oso berezia ematen diotenak.

Tontorretik gertu plaka tente batzuek bidera ateratzen zaizkigu. 

Azken zatia nabarmen leuntzen da eta ertza, duen basakeria galtzen hasten da. Bertatik ditugun bistak ikusgarriak dira eta inguru onetan eskalatzea erregali aparta.

Bat batean eta ezerezetik atera izango balitz bezala, Tres Conseillers tontorreko harri multzoa ikusten dugu (3.039 m). 6:20h Cap de Long aparkalekutik.

Eskuinera Nouvielle tontorra ikus dezakegu (3.091 m) eta ikusgarria den Tres Conseillers ertza (AD+) ere, hainbat oroitzapen on ekartzen dizkiguna. Bera izan bai zen eskalatzeko aukera izan genuen lehen ertz garrantzitsua.

Ezkerrerantz berriz Pic Long (3.192 m) eta mendebaldera duen ertz dotorea.

Nouvielle bretxatik itzultzen gara (2.926 m), errimaiara eremu oso hauskorretik jaitsiz. Rapel batek elurtegi iraunkorra libratzen laguntzen digu eta horrela, harri bloke labirintora eta Crête des Laquetesa iritsi ahal izateko.  

Cap de Long aparkalekurako itzulera goizean igotzeko erabili dugun bidea deseginez egiten dugu, 9:00h guztira.  

 

Datu teknikoak

  • Ibilbidea: Tres Conseillers Ferbos ertza
  • Kokapena:Pirinioak
  • Kategoriak : Ertza, Eskalada klasikoa
  • Zailtasuna:AD+
  • Harri eskaladaren zailtasuna:IV+
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:2:30 h
  • Nola iritsi:Cap de Long lakutik
  • Igotzeko denbora:3:50 h
  • Jeisteko denbora:2:40 h
  • Ezaugarriak:Gerturatzea luze egiten da eta ibilbidea bilatzea zail egiten zaigu. Ibilbide gehiena ertzetik egiten ba da ere, zailtasun handienak eskuinetik gainditzen dira.
  • Materiala:60 m-ko soka, friends eta fisurero joku bat eta zinta batzuek
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.