Espadas-Posets Ertza PD+

Capra Alpina(e)k idatzia.
2868
bisita

Aurretik Posets igotakoak ginen, baina jarduera polita iruditzen zitzaigun gainontzeko hirumilakoekin batera egitea. Ez da zailtasun handiko ertza, baina ez da edozein mendigoizale hasiberrirentzako jarduera bat ere. Pausu delikatuak daude, baina orokorrean aurreko egunean Bachimalan aurkitu genuen arroka baina hobeagoa topatu genuen. Horrela, zertxobait baztertuak dauden Pavots eta Espadas bezalako mendiak egin genituen.

Biados aterpetxetik atera eta GR11 arrastoak jarraitzen ditugu Chistau portura norabidean. Biados baserriak pasa, ezkerrera GR11 utzi eta eskuinetik GR11-2 jarraitzen dugu, hiru aterpetxeen bidetik. Zinqueta ibaia zubi batez zeharkatu eta xenda, pinudi eta zelai berdeetatik barrena  Ribereta sakana eskuinetik igotzen dugu.

Uhar baten arroa iristean altuera pixka bat galtzen dugu. Sigi-saga batzuez baliatuz muino berri bat igotzen dugu, azken pinuak gainditu bitarte eta goi larre batetik zeharkaldi etzan bat eginez, Forqueta de Eriste lepo eta Millars lakuaren gurutze bidera iristen garelarik.

Millars lakura doan bidea eskuinera utzi eta ezkerretik maldan gora jarraitzen dugu (SE). Goiko zirkura sigi-sagak eginez urreratzen gara (2.600 m) eta inguratzen duten legar-hobi malkartsuetatik jarraitu. Forketa de Eriste Lepora iritsi aurretik elurtegi iraunkor bat zeharkatu beharrean gara.

Eskuinera biratu (SSO), hasieran xendaz eta ondoren ertz zorrotzetik. Azken gandorra ezkerretik saihestu eta bi tontorrak lotzen dituen ebakira iristen gara. Forqueta SE gailurrera iristeko (3.004 m) (F), pasabide delikatu batez bitarteko tontor bat gainditzen dugu, ekialdetik berantz eginez saihestu dezakeguna. 

Ebaki txikira itzuliz, granitoko blokez osaturiko malda igotzen dugu eta inongo zailtasunik gabe, Forqueta tontorrera iristen gara (3.007 m) (F).

Forqueta lepora itzuliz, Llardaneta isurialdera ehun metro inguru jaisten ditugu ezkerrera biratu aurretik (ito) eta maldan erdi aldera mantentzen saiatzen gara, ondoren ertzaren ahora zuzenean igoz. 

Minutu gutxiren bueltan Diente Royo tontorrera heltzen gara (3.010 m) (F).

Gure pausuak atzera eginez, ertzera itzultzen gara eta Pavots tontorrera norabidean gorantz egiten dugu. Eskuak erabiltzea behartuak gaude irtengune erraz batzuek gainditu ahal izateko eta inongo zailtasunik gabe, altuera azkar irabaziz, Pavots tontorrera iristen gara (3.121 m) (F).

Tuca del Forau de la Neu (3.080 m) tontorrera iristea baztertzen dugu, Jorge Garcia Dihinx-ek ondo dion bezala “hirumila bezala katalogatu duten zabortegia”. Pavots lepora jaisten gara (3.097 m), bertatik Espadas ertza zirraragarria ikusten da, zailtasunagatik baino zorrotz eta airezko delako.

Igoerak ez du zailtasun handiegirik, II/II+ pasabideren bat tarteko, baina kontzentrazioa ezin dugu galdu.  

Behin zati hau gaindituta, ertzak bere bertikaltasuna galtzen du eta dagoeneko, askoz ere etzanago, mailakatuta dauden tontor batzuetara eramaten gaitu (3.150 m) (3.227 m) (3.252 m) (3.325 m) eta azkenik, Las Espadas gailurrean bukatzen da (3.332 m) (PD+).

Zailtasunik gabe ebaki batera jaisten gara, “Paso del Funanbulista” iritsi aurretik dagoena eta irtengune txiki bat gaindituz gero iristen garena. Pasartea ez da zaila ez konplikatua, baina bertigoa izanez gero, bi aldera duen eroriak edonor blokeatu dezake.

Behin pasata, ertzera itzuliko gaituen diedro (II+) bat ezkerretik gainditzen dugu eta dagoeneko zailtasunik gabe, Tuca de Llardaneta gailurrera iritsi gara (3.311 m) (PD).

Jaitsiera erraz batek zailtasunik gabe Tuqueta Roya gailurrera eramaten gaitu (3.273 m) (F).

Bertatik Jean Arlaud lepora jaitsi, izen bereko korridorea bukatzen den lekua, Posets-erako azken maldan igoera hasiz. 

Sigi-saga ugariek, tentea bezain erraza den malda igotzen laguntzen digute, Posets edo Llardana gailurrera iristen lagunduz (3.375 m) (F).

Behatoki paregabea. Perdiguero, Aneto, Maladeta, Eriste, Bachimala, Culfreda,……….. eta oinpean, Paul-Bardamina ertz zorrotza.

Canal Fonda ingurura bide arruntetik jaisten gara, Diente de Llardaneta lepoan geldituz (3.010 m). Aurrealdea erabat bertikala duenez, ekialdeko erlaitz mailakatuetatik ertza inguratzen dugu. 

Igoera arriskutsu bat eremu misto batetik (belar-arroka), leun agertzen den ertzera eramaten gaitu eta minutu gutxiren barruan, Diente de Llardaneta gailurra zapaltzeko aukera eman (3.085 m) (PD).

9:10 h eta gero gure helburua lortu dugu, naiz oraindik helmugatik urrun egon, Biados aterpetxea. Lepora iritsi eta Canal Fonda jaisten dugu, ezkerrera Angel Orus aterpetxera doan bide nabarmena utziz. 

Eskuinetik jarraitzen dugu (itoak) alturarik galdu gabe, urdin turkesa urak dituen Llardaneta laku ikusgarrira iritsiz (2.670 m).

Eguneko azken zailtasun garrantzitsua gainditu behar dugu, Forqueta de Eriste Leporako igoera (2.860 m).  Daramagun ibilaldia eta gero neketsua gertatzen zaigu eta arrastaka bada ere, igotzea lortzen duguna. Biados aterpetxera 20:10 h-tan iristen gara, afal orduan justu.

Datu teknikoak

  • Ibilbidea: Posets Biados eta Forqueta lepotik
  • Desnibela:1.661 m.
  • Kokapena:Pirinioak
  • Kategoria : Oinezko igoera
  • Zailtasuna:F
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:9:10 h
  • Nola iritsi:Biados aterpetxetik (1.714 m.)
  • Igotzeko denbora:13:30 h
  • Jeisteko denbora:4:20 h
  • Ezaugarriak:Ibilbide luze bezain polita eta zailtasunik apenas duena. Fisikoki prestatua egon behar dena.
  • Materiala:Makilak
  • Garaia: Uda, Udazkena
  • IBILBIDEAREN DATU GUZTIAK IKUSI

Datu teknikoak

  • Ibilbidea: Posets Espadas Posets ertza
  • Luzera:2 m.
  • Desnibela:2.000 m.
  • Kokapena:Pirinioak
  • Kategoria : Ertza
  • Zailtasuna:PD (III graduko pasoren bat)
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:9:10 h
  • Nola iritsi:Biados aterpetxe eta Forqueta lepotik. Bertatik hasten da ertza.
  • Igotzeko denbora:13:30 h
  • Jeisteko denbora:4:20 h
  • Materiala:Soka bat ondo etor liteke, norberaren abileziaren arabera.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.