Eriste Tontorrak - 3.053 m

Capra Alpina(e)k idatzia.
2065
bisita

3000 metrotik gorako hiru tontorrek osatzen dute Eriste mendizerra. Lehen begirada batez igoera erraza dirudi, baina hasiera puntua kontutan hartuta, ibilbide oso luzea zen; gainera, amaiera nahiko apurtuta zegoen kanal batetik igo behar izan genuen. Elurrak Pirinioetako maldak estaltzen ez dituenean batzuetan progresioa zaila egiten da, eta horixe bera pasa zitzaigun guri Abuztuko egun harta hiru tontorren trabesia egin behar izan genuenean. Aterpetxera iritsi ginenean ez genuen gogo askorik mendi hauek berriz zapaltzeko.

Biados aterpetxetik atera eta GR11 arrastoak jarraitzen ditugu Chistau portura norabidean. Biados baserriak pasa, ezkerrera GR11 utzi eta eskuinetik GR11-2 jarraitzen dugu, hiru aterpetxeen bidetik. Zinqueta ibaia zubi batez zeharkatu eta xenda, pinudi eta zelai berdeetatik barrena  Ribereta sakana eskuinetik igotzen dugu. Uhar baten arroa iristean altuera pixka bat galtzen dugu.

Sigi-saga batzuez baliatuz muino berri bat igotzen dugu, azken pinuak gainditu bitarte eta goi larre batetik zeharkaldi etzan bat eginez, Forqueta de Eriste lepo eta Millars lakuaren gurutze bidera iristen garelarik.

Ezkerrera Forqueta de Eriste leporako bidea utzi eta eskuinetik Millars lakura jarraitzen dugu. 15´barru Millars laku ikusgarrira iristen gara (2.360 m), Eriste handi eta Ipar Eriste edo Beraldik osatzen dute arroan kokatzen da.

Isurbidetik lakua zeharkatzen dugu eta mendebaldetik igoz kontrahorma bat zeharkatzen dugu, Leners lakura iritsi ahal izateko (2.515 m).

Ezkerretik zeharkatzen dugu, aurkitzen ditugun ito gutxiak jarraituz. Xenda arrasto guziak lakuan bukatu dira eta bloke handien artetik gora eta behera eginez, aurrera jarraitzen dugu. Denbora luzez gorantz egin eta Chelau lakuren arroa iristen gara.

 

Bertara iritsi beharrik gabe ezkerrera biratu eta Sen tontorretik (2.949 m) jaisten den kontrahorma gainditzen dugu. Izugarrizkoa den harrikari batera ateratzen gara eta ezin bestean zeharkatu behar duguna. Zeharkaldi horizontal bat eginez, bi lakuak banatzen dituen gandor harritsura iritsi nahi dugu.

Aurrera goazen neurrian, azken orduan faltan bota ditugun itoak berriz ere agertzen zaizkigu, ala nola xenda arrasto bat ere, naiz hasiera honetan asko zehaztugabekoa izan eta zirkoa ixten duen hormara zuzenean igotzen dena.  Badirudi Leners lakutik ipar ertzera zuzenean igotzen den bidea aurkitu dugula.

 

Igotzen goazen neurrian, menderaezin dirudien hormak bere ahulezia erakusten digu.  Hormaren oinpean aurkitzen dugun elurte izoztu bat eskuinetik saihesten dugu eta bere gainetik, ezkerrera zeharkaldia eginez, eremu malkartsu  batetik gainditzen dugu (II).

Zati arriskutsu hau behin gainditu eta gero, askoz ere lasaiago sentitzen gara. Gure gabeziak bukatu direla dirudi eta Gran Eriste gailurrera igo ahal izateko, korridore bat igotzea faltako litzaiguke. Baina oraindik ere ustekabe ezatsegin bat zain dugu.

Korridorea, luze eta tentea, ibilgaitza da. Ez dago aurrera egiterik harri-jauzirik eragin gabe. Segurtasuna bermatu ahal izateko banatzea erabaki  dugu. Bat gorantz doan bitartean, besteak babesean itxaroten du.

Indar asko erre ditugu korridorearen gainera iritsi ahal izateko, baina lortu dugu. Azken igoera erraz batek (II) Gran Pico Eriste tontorrera eramaten gaitu (3.053 m) (PD-).

Pirineoko mendi zerra handienak ikusteko behatoki egokia:  Aneto, Maladeta, Posets, Perdiguero, Bachimala, Culfreda, Monte PerdidoVignemale...

Hormak duen ebakira jaisten gara, Gralla Pasartea (2.999 m) eta behin Bagüeñola isurialdean, altuera gutxiena galdu asmoz harrikaria zeharkatzen dugu, Hego Eriste oinarrira bitarte. 

Kontrahorma txiki bat gainditzen dugu eta tximinia nabarmen baten norabidean goaz, gailurrera doan ertza iritsi asmoz.

Ertz zorrotzak zailtasunik gabe Hego Eriste gailurrera eramaten gaitu (3.041 m) (F+). Atzean eskuin aldean ikus daiteke Gran Pico de Eriste tontorra.

Igo garen bide berberetik harrikari luze eta aspergarrira jaisten gara. Ipar Eristen kontrahormak ekidin asmoz, ekialdetik saihesten ditugu. 

Behin gainditzea lortu eta malda desegin batetik gorantz egiten dugu, ondoren korridore maldatsuaz baliatuz ekialdeko ertzera iristea lortuz.

 Azken igoera erraz batek zailtasunik gabe Ipar Eriste edo Beraldi tontorrera eramaten gaitu (3.025 m) (F+).

Hirumilako hiru tontor hauetara dugun ikuskizuna, laku ugariz inguratuak, benetan ikusgarria da. Jenderik apenas ibiltzen den leku bat, zail egiten bai zaio Posets, Aneto, Maladeta, Perdiguero...  bezalako mendiekin lehiatzea. Masifikazioa gustukoa ez ba duzu, hemen paradisu txiki bat aurkitu dezakezu.

Datu teknikoak

  • Ibilbidea: Eriste handi Eriste tonterren zeharkaldia
  • Desnibela:1.693 m.
  • Kokapena:Pirinioak
  • Kategoriak : Ertza, Oinezko igoera, Trabesia
  • Zailtasuna:PD-
  • Harri eskaladaren zailtasuna:II
  • Ibilbide zirkularra:Bai
  • Hasiera puntuan amaitzen da:Bai
  • Nola iritsi:Biados aterpetxe eta Millars eta Leners lakuetatik
  • Igotzeko denbora:7:25 h erdiko tontorra, 10:35 h guztira
  • Jeisteko denbora:3:10 h
  • Ezaugarriak:Ibilaldi zati handi bat harrikarietatik egiten da
  • Materiala:Guk erabili ez ba dugu ere, 30 m-ko soka bat ondo etorriko litzateke
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.