Bachimala Ertza PD

Capra Alpina(e)k idatzia.
6071
bisita

Gistaín-eko bailaratik gora igo gara, "Emakume karabana"-gatik ezaguna, gure Hirumilakoen karabana partikularrarekin topo egitera. Kota hau gainditzen duten 9 tontorrez osatutako mendi multzoa, altuera gehiegi galdu gabe erlatiboki erraz igo daitezkeenak dira. Hala eta guztiz ere, pasarte batzuk esposizio handikoak dira eta, gainera, arroka txarrak bide guztian tentuz ibiltzera behartzen gaitu.

Goiz hotz bateko zazpiak dira eta oroitzapen itzelak dakartzagun Biados aterpetxetik atera gara. Atzeko aldean aurkitzen den pinudira zuzendu eta sigi-sagak jarraituz, altuera azkar irabazten dugu, basotik ateratzea lortuz. Tabernes aterpetxeko bide gurutze inguruan gaude eta ezkerrera utziz, aurrera jarraitzen dugu.

 

Eskuineko xenda jarraitzen dugu txabola txiki baten ingurura iritsiz. Gutxika bada ere ertzera gerturatzen goaz eta bertatik jarraitzen dugu Señal de Biados (2.601 m) mendira norabidean. Gailurrera iritsi beharrik gabe, ezkerrera hartu eta kontrako maldatik Señal de Biados lepora (2.538 m) jaisten gara.

Inongo zailtasunik gabe Bachimala gailurrera eramango gaituen bide arrunta ezkerrera utzi eta parez pare dugun malda belartsua igotzen dugu, bachimala ertzaren hasiera bila. Arroka erabat apurtua aurkitzen da.

Minutu gutxitan helduleku ugari dituen granitoko horma batera iristen gara (II). Zailtasunik gabe gainditzen dugu eta ertza estutzen hasten den tarte batera igotzen gara, Punta Sabre tontorraren azken maldan azpian hain juxtu, eta eskuinetik saihestu dezakeguna.

Harri bloke handien artean sigi-saga goaz itoak jarraituz, Punta Sabre (3.136 m) gailurrera iristen garelarik, mendi zerra honetako gure lehen hirumilakoa.

Posets mendigunera daukagun ikuskizuna aparta da. Zeharkatzeko aukera izan dugun ertz osoa argi eta garbi ikus dezakegu, Veteranos tontorretik Eristeko tontorra bitarte.

Denborarik galdu gabe zorrotz eta airezko den ertza  jarraitzen dugu eta naiz zirraragarria den, erraztasunez zeharkatzen dugu, Gran Bachimala edo Schrader gailurrera (3.177 m) iritsiz. 

Ekialdeko ertzetik berantz egiten dugu zeharkaldi delikatu batez (ezker), Punta Ladormeur oinpera bitarte. Harri hauskorreko korridore batek jaitsiera ez digu batere errazten eta edozein irristadak, ondorio txarrak ekar litezke. Arazoak izan ez ditzagun, itoak jarraitzea oso garrantzitsua da.

Lepoko zatirik baxuenera behin iritsiz (3.105 m), arroka seguruagoa eta trinkoagoa dela konturatzen gara.  10/15 metroko horma bat bidera atera zaigu, baina dituen helduleku onei esker, erraztasunez gainditzen dugu (II). Punta Ladormeur tontorrean aurkitzen gara (3.120 m).

Momentu batez ertzak bere itsura basatia galtzen du eta bloke handiak dituen gune zabal  batetik jarraitzen dugu. Bachimala lakuak mendebaldera agertzen zaizkigu (ezker).

Ekialdera berriz (eskuin) Aygues-Tortes lakuak, frantziako isurialdean.

Punta del Ibon tontorrera (3.100 m) iristea ez zaigu zaila gertatzen eta minutu batzuen baitan, tontorra markatzen duen punturik garaienean aurkitzen gara.

Bachimala Txikia, Marcos Feliu, Abeillé, Puerto de la Pez eta Pico de la Pez tontorrak aurrez aurre geratzen zaizkigu. Penagarria eguraldiak txarrera egin ahal izatea eta lainoak tarteka irensten gaitu, inguruan dugun edozer ikustera galaraziz.

Sakonune txiki bat libratu asmoz, metro batzuek jaisten ditugu eta erraztasunez, Bachimala Txiki gailurrera iristen gara (3.061 m).

Marcos Feliu tontorrera gerturatzen goazen heinean,  ertza berriz ere interesgarria azaltzen zaigu. Frantzia aldera erortzen den kanal bertikal bat ezkerretik zeharkatzen dugu eta granitozko  bloke handi batzuek gaindituz, Marcos Feliu tontorrera ailegatzen gara (3.057 m).

Gure hurrengo helburua Abeillé tontorra da eta bloke handietatik zehar bertara zuzentzen gara. Ertzeko sakonune baxuenetik zeharkatu behar dugu (2.998 m) eta aurrera jarraitu ahal izateko, eskuak erabiltzea ezinezkoa zaigu. 

Gailurra ertzaren mendebaldeko muturrean aurkitzen da. Hemendik aurrera ezkerrera jarraitzen du (MHM) eta era honetara, Bachimala lakuak aurkitzen diren zirkoa osatu. Bloke handi batzuek tarteko eta zailtasunik gabe, Abeillé tontorrera iristen gara (3.029 m).

Hemendik aurrera eta Puerto de la Pez tontorra iritsi bitarte, ertzaren zailtasunik handienak aurkitzen ditugu. Bachimala lakuek aurkitzen diren isurialdera jaistea  errazagoa da (HM) eta ondoren, hurrengo ebakitik ertzera itzultzea. 

Guk berriz, orratza eskuinetik zeharkatzen dugu. Zeharkaldia teknikoki zaila ez da, baina arroka oso hauskorra denez eta pasartea airezko, arriskutsua gertatzen da. 

Behin ertzaren ebakian, jendarme bat ezkerretik saihesten dugu. 

Berriz ere ertzaren gailurrera igoz, tximinia motz zein bihurgunetsu batetik jarraituz, Puerto de la Pez (3.019 m) gailurrera erraztasunez iristen gara.

Apenas bost minutu geroago eta inongo zailtasunik gabe, gaurko bederatzigarren eta ertzaren azken hirumilako gailurrera ailegatzen gara, Pico de la Pez (3.019 m).

Egin dugun ertza ikusterik ez izatea penagarria da, ala nola, Culfreda eta Lustou ertzak, eskuinera sumatzen baditugu ere.

Puerto de la Pez leporako jaitsiera eremu erraz batetik egiten dugu (2.478 m) eta ezkerrera biratuz, Bachimala lakuen ingurura harrikaritik jaisten gara. Ondoren, Biados aterpetxera bideratzen gara, Señal de Biados lepoa gaindituz.

Datu teknikoak

  • Ibilbidea: Bachimala Bachimala ertza
  • Desnibela:1.850 m
  • Kokapena:Pirinioak
  • Kategoria : Ertza
  • Zailtasuna:PD
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:7:20 h
  • Nola iritsi:Biados aterpetxetik
  • Igotzeko denbora:10:45 h
  • Jeisteko denbora:3:25 h
  • Ezaugarriak:Ibilbide luze eta oso harri txarrekoa.
  • Garaia: Uda
  • IBILBIDEAREN DATU GUZTIAK IKUSI

Igotzen diren mendiak

Lo egiteko aterpetxeak

Natur guneak

Erlazionatutako ibilbideak

Iruzkin bat egin

Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.