Lustou 3.023 m - Muturreko baldintzak

Capra Alpina(e)k idatzia.
1198
bisita

Aste bukaerako eguraldiaren aurreikuspenak ez dira batere onak; elurra, haizea eta 0º azpiko tenperatura. Aitzaki aproposa edozeinentzat ere etxean su beroaren inguruan geratzeko. Dena den, gure egitasmoarekin aurrera jarraitzeko asmoa dugu eta materialaren prestaketa burutzen dugu. Hurrengo egunenean goizean goiz geratzen gara Saint Lary herrira bidean ateratzeko.

Ongi etorria haize izoztu batek ematen digu , elur malutak erortzen diren bitartean. Tramezaïgues herriko bide gurutzera iristean, Bielsako tunelera doan D-929 errepidea utzi eta ezkerrera biratzen dugu. Rioumajou aranean gora asten gara, Péguère aranaren  elkargunean aurkitzen den aisialdi kanpaldiko aparkalekura iritsi bitarte 1.380 m (12 km St.Lary ). Elurra gogoz ari du eta kolore zuriak dena estaltzen du, termometroak berriz 0º azpiko tenperatura azaltzen du. Dagoeneko behar bezala hornitu gara, motxila astunak bizkarrera eraman eta Frédancon zubia gurutzatuz, ibilbidea hasten dugu. 

Pistak baso ikusgarri batetan barneratzen gaitu, erabat hornitua dagoena, hormigoi zubi bat topatu bitarte (1.500 m). Péguère txabolaren ingurura bitarte jarraitzen dugu eta bertara iritsi aurretik ezkerrera jarraitzen dugu (NNE), Piarre uharraren ertzetik altuera irabaziz. 

Haizearen indarra handitzen doa eta hotz-sentsazioak pixkanaka gorantz doa. Inguratzen gaituzten mendiek laino beltzez estaliak daude, behin eta berriz elurra erortzen jarraitzen duelarik.  Baso trinko honetatik atera eta eskuinetik gorantz jarraitzen dugu (E), uharraren norabidea alde batera utziz, ez aurretik Piarre uharraren ur-jauziak mirestu gabe. 

Bide arrastoak badaude ere elurrak erabat estaliak ditu eta gure senaz baliatuz aurrera jarraitzen dugu. Thou txabolaren bila goaz, jakin bai dakigu inguruan behar duela. Ezkerrera malda tente bat aurkitzen dugu eta zalantzak uxatuz, bertatik igotzea pentsa dugu. 

Gutxika bada ere altuera irabazten goaz eta bat batean, ur zorrotada galanta botatzen duen iturri bat ikusten dugu. Eguraldiak okerrera egin du, lainoak erabat irentsi gaitu, haizeak indar handiz astintzen digu eta errukirik gabe elur malutak guregana bideratzen ditu. Thou txabola (1.944 m) ez ustean gure aurrean azaldu da, mamu bat bai litzan. Denborarik galdu gabe barrura sartzen gara, eguraldi txarrez babestu asmoz. Bi zatitan banatua dago. Lehenean mahai, tximini, gas sukalde, zein kazuela eta zartagin ugari dauden eta bigarrenean holtz baten gainean hiru koltxoi. Guretzako aproposa dirudi. Bertan geratzeko tentazioa handia bada ere, kanpoan dugun eguraldia kontutan izanik, garbi dugu aurrera jarraitu beharrean garela, ez bai da asko falta ilundu dezan.

Thou txabola, urrengo egunean ateratako argazkia.

Txabolatik irten bezain laster errealitatera itzultzen gara, hotza, lainoa, haizea eta elurra. Ezkerrera azken pinu basatiak utziz altuera irabazten hasi gara. Seguruenik xenda edo hito arrastoak egon badaude baina elurte ikusgarriak denak ere estaliak ditu eta aurrerantz egitea asko zailtzen digu. Ikuspena erabat murriztu zaigu. Bidea elurretan zabaldu behar dugu eta denak txandatuz bagoaz ere oso motel gabiltza.

Arratsaldeko bostak dira eta ilundu aurretik apenas 30 minutu geratzen zaizkigu. Denda zabaltzeko leku apropos bat bilatzeko ordua iritsi da. 2.550 m altueran aurkitzen gara. Elurretan zulo bat egiten hasi gara denda txikia jarri asmoz. Ordubete ondoren hirurok zakuetan sartuak gaude, bero mantentze arren.  Dendaz kanpo dugun tenperatura -11º da eta denda barrukoa -4º. Haizea indarrean dabil eta dendako horma finak gogorki astintzen ditu, elurra erortzetik uzten ez duen bitartean.

Bi ordu pasa dira eta lo aurretik zerbait jatea erabaki dugu. Arratsaldeko zortziak dira eta afari bero bat prestatzen hasi gara baina su txikiak ez du ura irakiteko gaitasunik. Ordu bete geroago irakiterik izan ez duen arroz egosi bat jaten ari gara. Dena den bero dago eta egoera honetan eskertzen da. Berriro ere zaku barruan uzkurtu eta gau hotz eta luzea igarotzeko prestatu gara.

Eguna argitu du baina zaku barruan murgildurik jarraitzen dugu, inork ateratzeko ausardiarik ez du. Denda barrua erabat izoztua dago. Denda inguruan berriz 20/30 zentimetroko elur geruza pilatu da. Kaka zaharra, argazkiak ateratzeko kamara ere izoztua daukat. Ordu bete geroago nagikeriaz dendatik ateratzen hasten gara eta ibiltzen hasi aurretik, arroz esne bero bat gosaltzen dugu.

Hotz handiak jarraitzen ba du ere, elurra egitetik utzi du, zerua oso estalia dago eta haizeak gogor astintzen jarraitzen digu. Itxuraz gaur ere eguzkia ikusterik ez dugu izango. Lustou lepora doan malda tenteari ekiten diogu eta segituan berotzen gara. Kranpoiak jantzi ditugu naiz eta gabean egin duen elurrak bidea zabaltzera behartzen digun, goranzko ibilbidea neketsua eginaz. Ordu bete baina gehiago iraun duen igoera gogorra eta gero Col de Lustou-ra (2.649 m) heldu gara.  

Haizeak gogortasunez astintzen digu eta hotza handia da. Ertzak elurrik gabe ez du aparteko zailtasunik eskaintzen, baina orain itxura beldurgarria du. Izotzak elur biguna ordezkatu du, naiz elurzulo eta erlaitzetan pilatua aurkitzen dugun.

Gutxika bada ere ertza zuinkatzen dituzten irtengune izoztu txiki ugari gainditzen goaz, Lustou gailurrera gerturatuz. Dagoeneko 2.900 m goitik gabiltza eta irtengune tente batek bidea histen digu. Erraz gainditzen utziko den itxurarik ez du. Eskuinetik saiakera egiten dugu baina ez dirudi lekurik aproposena. Orain ezkerretik goaz baina atzera egin beharrean gara, akats txikienak ere ezinbestean Azet aranaren sakonera eramango bai liguke. Parez pare eskalatzea erabaki dugu, baina behin ertz gainean, ezegonkor, airezko eta oso estua dela sumatzen dugu eta  hauek, bertatik jarraitu ahal izateko baldintzarik aproposenak ez dira. Behin eta berriz saiakera ezberdinak egin arren, beti ere atzera botatzen gaitu. Ez dugu argi ikusten eta beharrezkoak ez diren arriskuak hartu nahi ez ditugunez, eskalada bertan behera uztea erabakitzen dugu.

Uko egitea ez da inoiz erraza izaten baina egoera honetan hartu genezakeen erabakirik zuzenena izan da. Ditugun sentsazioak kontrajarriak dira, gailurra zapaltzea gustukoa genuen, baina garbi dugu erabaki zuzenena hartu dugula. Berantz gatozenean lehen aldiz eguzkia ikusten dugu, badirudi laino beltzen artetik atera nahi duela.

Azken bi egunak zerua estali duten laino beltzek, bat batean, desagertu dira. Dudarik gabe, abentura ikusgarri honi bukaera emateko erarik hoberena.

Datu teknikoak

  • Ibilbidea: Lustou Neguan, Rioumajou araneko aisialdi kanpaldiko aparkalekutik
  • Desnibela:1.643 m.
  • Kokapena:Pirinioak
  • Kategoriak : Kranpoiak, Oinezko igoera
  • Zailtasuna:PD+
  • Hasiera puntuan amaitzen da:Bai
  • Iristeko denbora:5h lehen egunean + 3h bigarrenean
  • Igotzeko denbora:11:00 h
  • Jeisteko denbora:3:00 h
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.