Anayet-eko balkoiak (D+)

Capra Alpina(e)k idatzia.
8125
bisita

Aspalditik adi eduki izan gaituen eskalada izan da. Sendero limitek 8 eta 10 mm-ko paraboltez ikusgarri ekipatua duena eta Anayet tontorrera zuzenean igotzeko aukera ematen diguna. Ibilbideak ekialde horma zeharkatzen du eta dituen 350 m 12 luzeetan banatzen dira, murriztu daitezkeenak. Igo ahal izan ditugun beste eskaladen ezberdintasun garrantzitsu bat du, bereizia egiten duen “triedro” dotore bat. Lehen luzeetako harkaitzen kalitatea ez da batere ona, belar uneak ere aurkitzen ditugularik, baina gorantz goazen heinean, asko hobetzen da.

Horma oinpera gerturatzea Portalet-Espeluciecha edo Corral de las Mulas aparkalekutik egin daiteke. Lehen aukera erabakiz gero, Canal Roya atakara igo beharrean izango gara eta horma gainditu ferrata klasikotik (soka eta katea), Espelunciecha maldan eskuinera aurkitzen dena,  Anayet lakuetara iritsi ahal izateko. 

Bestalde, bigarren aukera erabaki ezean, bi kilometro ibili beharko ditugu Anayet eski aparkalekura bitarte eta horrela, oiko ibilbidetik (GR11) Anayet lakuetara iritsi.

Guk bigarren aukera hautatzen dugu eta bi ordu inguruan, hormaren oinpera iristea lortzen dugu, bertan disko urdin bat aurkitzen dugularik eskalada ibilbidearen hasiera markatuz. Bikote bat triedroa eskalatzen ikusten dugu eta zein geldi doazen ikusiz, duen zailtasuna sumatu dugu. Lehenik eta behin kaskoa janzten dugu, ezin arriskatuko gara harriren bat botako balute. Dagoeneko osagai guziak gainean, eskalada hasten dugu. 

Lehen luzea V-: Txaparik ez duen parabolt bat eskuinera utzi eta ezkerretik igotzen hasten gara, gure lehen parabolta bi metrora aurkitzen dugularik. Eskalada ez dugu sentsazio onekin hasten, arrokaren kalitatea ez baita batere ona  eta gainera hotzak gaude. Dena den, paraboltak gertu daudenez erraztasunez gainditzen dugu lehen luze hau eta horrek, konfiantza berreskuratzen laguntzen digu. 

Bigarren luzea IV+: Aurreko ibilbidearen antzeko, belar une batzuez tartekatua, baina zailtasun handiegirik gabe igotzen duguna triedroaren oinpe-arte, horrela bi eta hiru luzeak lotuz.

Hirugarren luzea V+:TRIEDROA. Luze delikatuena eta dudarik gabe, ibilbideari zailtasuna ematen diona. Helduleku txiki eta eskasak dituen plaka bat igotzen hasten gara eta bigarren parabolta iristean, eskuinera egiten dugun zeharkaldi batek triedrora eramaten gaitu.

Triedroa oso modu berezian gainditzen dugu, Babaresa teknika erabiliz.

Laugarren luzea III+: Zailtasun handirik gabeko luzea, bertan dauden harri solte guziak kontutan izan ezean eta ez bota ahal izateko, tentu handiz ibili beharko garena.

Bosgarren luzea V-: Ezkerrera aurkitzen diren bloke estraplomatu batzuetatik igotzen gara (V-),  arroka ezin hobea duen plaka etzan batera atera bitarte (IV) eta bertatik, inongo zailtasunik gabe, hurrengo bilkura gunera iristen gara.

Seigarren luzea IV+: Arroka oneko plaka etzan batetik doa, amildegi ikusgarriaren bi metro eskuinera. Erregeleta eta helduleku gutxi egon arren, daudenak ezin hobeak dira. 

Zazpigarren luzea IV+: Arroka zubi batetik zintzilik dagoen soka batez babestua dagoen tximinia tente batetik igotzen gara. Ezkerrera doan zeharkaldi  batek ematen dio jarraipena hurrengo bilkura gunera iritsi bitarte. Arroka ezin hobea izaten jarraitzen du.

Zortzigarren luzea V-: Tximinia tente bezain polit eta dibertigarri batetan sartu ahal izateko, zertxobait ezkerrera desbideratzen gara. Hiru bat metroko horma estraplomatu batek, besoetatik tira egitea behartzen digu. Dudarik gabe ibilbidean zehar gehien gustatu zaigun luzea.

Bederatzigarren luzea IV+: Bertikalean ateratzen gara eta erraz gainditzen ditugun bloke batzuetatik jarraitzen dugu, bilgune berri-arte. Beste bilgunetik alderatuz, honako honek, parabolt bat eta bloke handi baten inguruan zinta luze bat jarria du. Oso leku estrategikoan dago, bertatik oso gertu ikus dezakegu ibilbide arrunteko azken tximiniaren sarrera.

Hamargarren luzea IV+: Gure azken luzea eta eskaladaren bukaera. Eskalada ertzetik zuzen zuzenean doa. Paraboltak urrunago dauden arren erraz gainditzen dugu. Arroka kalitate onekoa izaten jarraitzen du, hasieran izan dugunarekin zer ikusirik ez duena. Azken bilkura tontorraren azpitik metro batzuetara aurkitzen da. 

Azken bilgunera iritsi bezain laster, eskalada bukatutzat ematen dugu. Anayet (2.545 m) tontorretik metro eskas batzuek banatzen gaituzte eta erraztasunez bertara iristen gara. 3:10 h eskalada behar izan dugu horma ikusgarri hau gainditu ahal izateko.

Corral de las Mulas aparkalekurako itzulera ohiko bidetik egiten dugu, kateen pasabidetik eta Anayet eta Vértice de Anayet banatzen dituen lepotik jaitsiz.

Datu teknikoak

  • Ibilbidea: Anayet Anayet-eko Balkoiak
  • Desnibela:350 m.
  • Kokapena:Pirinioak
  • Kategoriak : Eskalada klasikoa, Kirol eskalada
  • Zailtasuna:D+
  • Harri eskaladaren zailtasuna:V+
  • Luze kopurua:10
  • Hasiera puntuan amaitzen da:Bai
  • Iristeko denbora:5:10 h (eskalada 3:10 h)
  • Nola iritsi:Portaleteko parking-etik, Anayeteko bide normala. Lakuetatik hormarantz zuzendu eta plastiko urdin batekin markatzen da bidearen hasiera.
  • Igotzeko denbora:6:40 h
  • Jeisteko denbora:1:30 h
  • Ezaugarriak:Jendez gainezka egon daiteke. Pazientziarekin hartu. Parabolt asko daude bidetik, eskalda deportiboan bihurtzen delarik bidea. Zati batzuk zailtasun tekniko gutxi dute eta luze batzuk enpalmatu daitezke.
  • Materiala:Express zintak, bilkunerako materiala, 60 m-ko bi soka, kaskoa, arnsea eta katu hankak.
  • Garaia: Uda, Udazkena
  • IBILBIDEAREN DATU GUZTIAK IKUSI

Datu teknikoak

  • Ibilbidea: Anayet Corral de las Mulas-etik
  • Desnibela:820 m.
  • Kokapena:Pirinioak
  • Kategoria : Oinezko igoera
  • Zailtasuna:F+
  • Harri eskaladaren zailtasuna:II-
  • Hasiera puntuan amaitzen da:Bai
  • Iristeko denbora:5:10 h (eskalada 3:10 h)
  • Nola iritsi:Corral de las Mulas aparkalekutik, 5,5 km. Formigal Portalet errepidetik.
  • Igotzeko denbora:6:40 h
  • Jeisteko denbora:1:30 h
  • Materiala:Makilak.
  • Garaia: Uda, Udazkena
  • IBILBIDEAREN DATU GUZTIAK IKUSI

Datu teknikoak

  • Ibilbidea: Anayet Corral de las Mulas-etik neguan
  • Desnibela:950 m.
  • Kokapena:Pirinioak
  • Kategoriak : Eskia, Korridorea, Trabesia
  • Zailtasuna:PD+
  • Korridorearen graduazioa:40º
  • Hasiera puntuan amaitzen da:Bai
  • Iristeko denbora:5:10 h (eskalada 3:10 h)
  • Nola iritsi:Corral de las Mulas aparkalekutik, 5,5 km. Formigal Portalet errepidetik.
  • Igotzeko denbora:6:40 h
  • Jeisteko denbora:1:30 h
  • Ezaugarriak:Elurrarekin igoera tekniko eta alpinoagoa da. Katea bitarteko pausua zulora begira dagoen plaka batetik gora egiten da. Hemendik aurrera, elur kopuruaren arabera, igoeraren zailtasuna handitu egin daiteke, ondoren 40ºko korridore bat igo behar baita.
  • Materiala:30 metrotako soka, zinta eta fisurero batzuk korridorea eta katearen pausua aseguratzeko.
  • Egoera:Elurrarekin.
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.