Ipar korridorea Arranoaren tontorrera

Capra Alpina(e)k idatzia.
4515
bisita

Aurreko egunean Peña Telerako Diagonal Handia egin ostean, gure indarrak ahul zauden. Hala ere, egun eguzkitsua aprobetxatu nahian, fisikoki exigentzia maila hain altua ez zuen jarduera bat egiteko prestatu ginen. Riosetako zirkurantz abiatu ginen, Asperen begiradapean. Militarren kuartelean kranpoiak jantzi eta ordu erdi exkaxean, Arranoaren tontorraren ipar korridorean sartu ginen.

Lehen 100 metroak tipi tapa, erraz, librean igo genituen, 45ºko inklinazioan. Halako batean, beste bi kordadekin elkartu ginen.

- 6. kordada zarete! - esan ziguten.

- Aurreko guztiak rapelatzen hasten badira, jai dugu! - guk.

Gure aurreko kordada euskalduna abiatu zen maldan gora, lehen luzean. Guk pazientzia askoz hartu genuen, berehala jarraitzen bagenien, gorako bilkunean elkarrekin topo egingo baikenuen berriz. Ordu erdi baina gehiago itxaroten egon eta gero, berriz bueltan genituen, rapelatzen. Ez genekien beraien itzultzeko arrazioa eta jakinminari ezin eutsirik, galdetu egin genien.

- Izugarrizko kondizioak zeudek korridorean, sekula ez diat hain ondo aurkitu. Baina hainbeste elur egotean, ez dituk bilkuneak ikusten eta jeisteko, destrepatu egin beharko genikek. Nire neska ez zegok horretara ohitua, bere lehen korridorea baituk.

Hala ba, guk ere gure dudak izan genituen, ez baikenekien mendiaren atzekaldetik hain jetsiera ona zegoenik. Baina aurrera jarraitzea erabaki genuen, aurretik zeuden kordada guztiak nonbaitetik jetsi behar zirela pentsatzen baikenuen. Eta korredoretik rapelatzen ez genituen ikusten. Beraz, beste bideren bat egongo zelakoan geuden.

1. luzea (40 m.): Luze zailena, batez ere elur gutxi dagoenean, harri bloke batek mixto zati bat (IV+) exigitzen baitu. Gure elur kondizioetan, dena estalirik zegoen. Beraz, 70ºko erresalte bat besterik ez genuen aurkitu. Bilkunea estali gabe aurkitu genuen, bi pitoi eta bi argoilekin.

2. luzea (50 m.): Beste erresaltetxo bat, hau erdi izoztua zegoelarik. Korridorea tenten mantentzen zen, konstate. Burua hotz mantenduz, aurrera jarraituz, "rimaya" txiki batean egin genuen bilkunea, estaka ondo sartuz, eta friend baten laguntzaz indar triangelu bat eratuz.

3. luzea (70 m.): Guk 60m-ko soka genuenez, motz geratu ginen, baina maldaren erdian egin genuen bilkunea. 10 metro gorago ikusten genuen, harri baten azpian, bilkunea, harri tunel batean sartuta zeuden kordinoekin osatua. Luze honek beste erresaltetxo bat zuen, baina dena elurrez estalirik zegoenez, erraz gainditu genuen. Elur gogorraren azpian izotza zegoenez, pausua babestu genuen pare bat elurretako iltzerekin. Bilkunea, piloleta T forman elur gogorretan sartzen egin genuen.

4. luzea (70 m.): Errazena. Hemen jada malda asko jeisten da. 50 bat graduko malda batetik gora egin genuen, soka jarrita genuenez, beste luze bat egin genuen. Korridorearen amaieran, zuhaitz batean, kordinoak daude jarrita, rapelatu nahi bada. Hazti rapelatzeko unean, azken bi luzeetan destrepatu egin beharko baitugu, luzeak 60 metro baina gehiagokoak baitira.

Hemendik, tontorrera! Derrigorrezko argazkitxoa atera eta beheruntz, bazkaltzera! Eguna primeran pasa dugu eta oin arrastoak jarraituz, ez dugu galtzeko arriskurik izan. Jetsieran, hori bai, pausu lateral delikatu bat aurkitu dugu, baina nahi izanez gero, zuhaitz batean, rapelatzeko kordino bat dago jarrita. Agian, okerrena, oin arrastorik ez badago, enbajadaren batean sartzeko aukera da. Ordu eta erdian, kotxean gara, tripa betetzeko prest!

Datu teknikoak

  • Ibilbidea: Arranoaren tontorra Ipar Korridorea
  • Igoera data:23-02-2014
  • Desnibela:270 m.
  • Kokapena:Pirinioak
  • Kategoriak : Korridorea, Kranpoiak
  • Zailtasuna:D-
  • Harri eskaladaren zailtasuna:IV+
  • Korridorearen graduazioa:70º
  • Luze kopurua:4
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:40 min.
  • Nola iritsi:Kotxea Canal Royako parking-ean utzi eta Rioseta zirkuan sartuko gara. 30-40 minutura korridorearen hasieran aurkituko gara, zirkuaren ezkerretara.
  • Igotzeko denbora:3h.
  • Jeisteko denbora:1h. 30 min.
  • Ezaugarriak:Neguko korridorea, non elur gutxirekin zailtasuna asko igo daitekeena, pare bat erresalte baititu (IV+). Jetsiera rapelatzen egin daiteke, baina elur asko badago, ez dira bilkuneak azalduko. 60 metroko sokarekin, azken bi luzeetan destrepatu egin beharko dugu. Arranoaren tontorra inguratuz jeistea da beste aukera.
  • Materiala:2 izotzetako iltze, 3 friend, fisureroren bat, bilkunetarako zintak, 2 piolet, 60 metroko bi soka, kaskoa, kranpoiak eta estaka bat.
  • Egoera:Elur gogorra.
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.