Irumugarrieta - 1.431 m

Capra Alpina(e)k idatzia.
2390
bisita

Zeharkaldi borobil honek,  Albia trikuharrian hasi eta ekialdeko Malloak ezagutzeko aukera emango digu. Beloki, Alborta, Uarrain, Subizelaigañe, Ttutturre, Pallardi, Mendiaundi eta Irumugarrieta mendiak igotzeko aukera izango dugu,  Pagomari eta Guardetxetik zehar itzuli aurretik. Ibilbide luze bezain polita eta eguraldi ona izanik ikusgarria. Gora behera askokoa naiz altuera handiegirik gainditu beharrik ez izan. Gure arbasoen lurraldea eta betidanik erabilia izan dena, bertan aurkitzen diren borda, txabola, saroi, hesi, trikuharri, ikus besterik ez dago.

Albia trikuharriaren inguruan kotxea utzi dugu eta langa batez itxia dagoen pistatik abiatu gara. Txabola pare bat atzean utzi ditugu eta bidea gorantz hasi da. Goiz hotza dugu baina eguzkia dagoeneko altxa da eta aurreneko izpien berotasuna nabaria dugu. Pista bukatu ostean ezkerrerantz doan bidexka bat jarraitzen dugu, arroka artetik zelai batetara helduz. 

Bertan dagoen borda ezkerrera utziz, bidexkak Beloki mendiaren magalera garamatza, ezkerrera Txameni eta Txorrotxeta mendiak utziz. Malda tentea dugu aurrez aurre, baina lasai hartuz Beloki tontorrera iritsi gara (1.271 m) 50´.

Denborarik galdu gabe, Unagako putzuaren ingurura jaisten gara, aurrez aurre Ttutturre mendia dugularik. Atakazar trikuharria ikusi dugu Alborta mendira bidean. Pago eta harri artean doa bidexka azken maldan desagertu aurretik. Alborta tontorrean gara (1.228 m) 1:15 h.

Ertzeko harrietatik jaitsi eta behin belarretara ailegatuz, azken malda belartsu batek Uarrain gailurrera eramaten gaitu (1.221 m) 1:30 h. Subizelaigañe tontorra ez dago urruti eta hemen gaudenez, bertaraino joateko erabakia hartu dugu ( 1.205 m) 1:45 h.

Alleku mendia ezkerrera utziz, zeharkaldia egiten dugu Abateko lepora iritsi ahal izateko, Alleku eta Ttutturre artean. Lepo honetara Intzatik igoz ailegatu dezakegu. Parez pare dugun aldapa tente eta bortitza ikusten dugu eta denborarik galdu gabe, goratzako bideari ekiten diogu. Arnas estuka baina dagoeneko iritsi gara punta dotore honetara, Ttutturre (1.282 m) 2:10 h.

Bertatik bista izugarriak ditugu Araitz ibarrera. Aralar mendizerrako bizkar hezurra, dudarik gabe, Malloak osatzen dute. Iparraldetik berantz abiatu gara, hasi harri artetik ondoren belarditik. Pagadian zehar malda bat gainditu beharrean gara Pallardi mendiaren azken ertz harritsura iristeko. Zailtasunik gabe, naiz eskuak erabili beharra izan, Pallardi gailurrera iritsi gara (1.289 m) 2:30 h.

Gezurra dirudien arren Ttutturre baina 7 m garaiagoa da. Pallardik ez du Ttutturrek bezain besteko dotoretasunik ez eta ikusgarritasunik, baina gauzak horrela dira. Inguru honetako gailurretan buzoak oso antzekoak dira, amanita muskaria bat hain zuzen, egia esan atentzioa deitu digu. Pallardiko jaitsiera tentuz egin beharrekoa dela esango nuke, oso tentea  eta harri askokoa. Illobi lepora jaitsi eta berriz ere gorantz hasi gara, Atallorbe borda eta borobildua den izen bereko tontorra gainditzeko (1.275 m) 2:55 h.

Gure helburura gerturatzen hari gara, oraindik urrunean ikusten badugu ere. Aurrez Mendiaundi gailurretik pasatu beharrean gara. Aurrez aurre ikus dezakegu, azken malda erraz bat igo behar dugularik. Iritsi gara Mendiaundira (1.310 m) 3:05 h. Bertan dagoen buzoa erabat ezberdina dugu, harritzekoa. 

Eguneko azken gailurrera abiatzen gara, hain zuzen Irumugarrieta edo Intzako Dorrea bezala ezagutzen dena.  Beste tontor batzuek igotzeko aukera badugun arren, denbora aurrera doanez, beste baterako utziko ditugu. Hasieran belardi leun batetik ondoren harrikaritik goaz, gutxika bada ere gerturatzen. Gertu dago baina ez gara berehala iristen, gora eta behera, ezkerretik eskuinera, harri eta zulo saihesten goaz.

Gure ailegatzeko gogoak Beldarri mendira ia eraman gaitu, eskerrak azken unean atzerago Irumugarrietako tontorra antzeman dugunik. Arrasto gorriak jarraitzen goaz, bestela nork daki non bukatu genezakeen, dena den eta lainorik ez badago galbide handirik ez dugu, denbora gehiago ibili beharra soilik. Azken maldara iritsi gara, dagoeneko Irumugarrieta  gailurrean gaude (1.431 m) 3:40 h.  

Aralar mendizerrako mendirik garaienean, bakar bakarrik gaude. A zer nolako bakea dagoen hemen, ez dugu ezer entzuten nolaz eta txorien txorrotxioa ez den. Edozein lekuetara begiratzen dugularik ere ikuskizuna aparta da. Hainbeste aldiz igo dugun Txindoki ere urrunean ikus dezakegu.

Beste aldera begiratzen badugu berriz, eginiko bidea eta igotako tontorrak ikus ditzakegu.

Gain honetan haizea dabil eta nabari da freskotasuna, hoztu aurretik berantz goaz. Berriro ere harrikarian buru belarri sartu gara. Ez dugu Igaratza ingurura jaitsi nahi, bai ordea txamenira. Gora behera ugari eginez, hainbat zulo saihestuz, azkenean lortu dugu harri artetik irtetea eta dagoeneko askoz ere lasaiago, or goaz tapiza dirudien belarditik.

Txameni mendia gure ezkerrera utziz, Lekoain lepora (1.198 m) zuzentzen gara. Inongo zailtasunik gabe Pagomarira iritsi eta pista zabala hartuz,  Guardetxera arinki goaz. Otsotesare eta Eubia trikuharriak atzean utzi ditugu eta Albia trikuharrira iritsi gara, 6:00 h.

Datu teknikoak

  • Ibilbidea: Irumugarrieta (Aralar) Albia trikuharriaren inguruan dagoen aparkalekutik
  • Igoera data:11/01/2014
  • Kokapena:Euskal Herria
  • Kategoriak : Oinezko igoera, Trabesia
  • Zailtasuna:F
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:3:40 h
  • Nola iritsi:Albia trikuharriaren inguruan dagoen aparkalekutik
  • Igotzeko denbora:6:00 h
  • Jeisteko denbora:2:20 h
  • Ezaugarriak:Ibilbide luze eta exigentea, gora behera ugari dituena
  • Materiala:Makilak
  • Garaia: Uda, Negua, Udazkena, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.