Mercadau tontorrak

Capra Alpina(e)k idatzia.
1077
bisita

Panticosa eta Mercadau aranen mugan aurkitzen diren bi mendi apal dira. Betidanik erabilia izan den Mercadau portu inguruan daude, orain gutxi erabilia bada ere. Espainia eta Frantziako lurren muga naturala osatzen dute. Bi tontor ditu, bat Ipar Muga (2.676 m.) igotzeko erraza dena, bestea  Hego Muga (2.727 m.) eta garaiena, zailtasun pixka bat duena (I+), nolaz ipar ertzetik igotzen saiatzen garen. Kokaleku paregabean daude, mendi garaiez eta laku ugariz inguratuak. Ikusgarria den gerturatzea, Panticosa, Bachimaña eta Pecico lakuetatik egingo dugu; erabat gomendagarria.

Goizean goiz, Panticosako Harri Etxe aterpetxeko aparkalekuan kotxea utzi eta bere atzean aurkitzen dugun bidea jarraituz, igoera hasten dugu; GR11 bidea hain zuzen. Sigi-saga tente batzuek jarraituz, arinki saltoka datorren Caldares ibai ingurura garamatza.

Bi hormen artetik bidea eginez goaz, oso leku meharra, nekez joan gaitezke bi lagun elkarren ondoan. Bat batean zabaltzen da eta zelai berde batean uzten gaitu; kanpatzeko leku aproposa. Caldares ibaia betidanik eskuinean eramanez, eroso goaz gorantz. Bide hau oso erabilia da eta galbiderik ez du.

Bat batean parez pare horma erraldoi bat aurkitzen dugu 1:00 h., Fraidearen aldapa izan behar du nola nahi ere. Halaxe da, sigi-saga ugariek ezkerreko maldatik igotzen Laguntzen gaituzte.

Dagoeneko gainditzear gara, Bachimaña beheko urtegia bertan egon beharko luke, aterpetxe berriarekin batera. Bai, hemen daude (2.160 m.) 1:35 h.

Malda txiki bat igoz Bachimaña goiko urtegiko hormara iritsi gara (2.240 m.) 1:45 h. Goi ibarreraino joan behar dugu, ezkerretik doan bide eroso bat jarraituz. Urtegia  handia da benetan eta denbora behar dugu zeharkaldia egiteko. Dagoeneko ikus ditzakegu Mercadau mendiak eta sumatu gure bidea nondik joan daitekeen (2.220 m.) 2:05 h.

Iritsi gara bide gurutzera, aurrera jarraituz Infernuko lepora ( GR11), eskuinera Merkadau portura, eskuinerago hartuz Bramatuero urtegietara eta gu gatozen bideak, berriro ere, Panticosara eramango gintuzke. Gure aukera bigarrena denez, eskuinera desbideratuz uharra zeharkatzen saiatzen gara, askotan busti gabe zeharkatzea ez da erraza izaten.

Hasieran irtengune bat eskuinetik zeharkatu behar dugu, hondoren gorantz igoz. Malda erdira iristean eskuinerantz jarraitzen dugu, bide askoz etzanago batetik, Infernuko tontorrak bizkarrean eramanez. Pecico lakutik datorren uharra zeharkatzen dugu, bestaldeko maldatik igo ahal izateko. Laster batetan lehen Pecico lakua dagoen sakonunera iristen gara (2.450 m.) 2:50 h. 

Leku dotore eta lasaia, Facha handia atzean duelarik. Lakuko urak bare bezain hotz daude. Bertan gaudenez, bigarren eta handiena den lakua ikusteko desbideratzen gara. Pecico laku handia (2.295 m.) 3:00 h. Merezi izan du honaino etortzea; Ikuskizunez isilean gozatu besterik ez dugu.

Bertan gelditzerik ez eta Merkadau portura bidean goaz, aurrez utzi dugun bidea berriz ere berreskuratuz. Inongo zailtasunik gabe iritsi gara (2.540 m.) 3:15 h. Mercadau aranera dugun ikuskizuna benetan ederra da.  Urrunean Wallon aterpetxea ere ikus dezakegu. 

Ipar Muga gailurra gertu ikusten dugu eta inolako zailtasunik gabe, maldan gora hasi gara. Bide garbirik ez dago baina galbiderik ez du. 

Ipar Muga (2.676 m.) 3:40 h. Panticosa aranetik oso erraza azaltzen bazaigu ere, Mercadau aranetik begiratuz itxura oso ezberdina azaltzen du.

Hego Muga tontorrera iristeko, bien arteko ertza jarraitu besterik ez dugu. Zailtasun handirik ez badu ere, tentu handiz ibili behar gara. Azken jaitsiera batek, Hego Muga lepoan utzi gaitu.

Igoera erraz bat gelditzen zaigu gailurrera iristeko. Hego Muga (2.727 m.) 4:40 h.

 

Jaitsiera zuzena egiten saiatzen gara, malda tente eta harri hautsi artetik, bai eta egin ere denbora irabazi ahal izateko. Pecico lakuen ikuskizuna aparta da; benetan ederra. Facha handia ere arro eta tente ikusten dugu aurrez aurre, a zer nolako oroitzapenak.

Bidera iritsi gara, a zer nolako lasaitua. Berantz goaz Bachimaña urtegien bila eta behin hauek gaindituz, Fraidearen aldapa jaitsi eta masifikatua bezain ederra den bidea jarraituz, Panticosako Harri Etxe aterpetxera heldu gara, 6:15 h. 

Datu teknikoak

  • Ibilbidea: Hego Muga Panticosa eta Mercadau portutik
  • Kokapena:Pirinioak
  • Kategoria : Oinezko igoera
  • Zailtasuna:F+
  • Hasiera puntuan amaitzen da:Bai
  • Iristeko denbora:4:30 h
  • Nola iritsi:Panticosako Harri Etxe aterpetxetik
  • Igotzeko denbora:6:15 h
  • Jeisteko denbora:1:45 h
  • Ezaugarriak:Ibilbide luze eta desnibel handikoa. Azken ertzak eskuak erabiltzea eskatuko digu.
  • Garaia: Uda, Negua, Udazkena, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.