Anie San Martin Harritik

Capra Alpina(e)k idatzia.
3271
bisita

Anie edo Auñamendi gailurra, Erronkari bailaran ezaguna den bezala, itsas atlantikotik etorriz 2.500 m gainditzen dituen lehen mendia dugu. Duen piramide forma oso ezaguna eta bereizia da eta Larrako karst izugarriaren gainetik nabarmentzen da. Mendi sakratu baten aurrean gara, hain zuzen Mariren bizilekuan eta ekaitz izugarriak sortzen zituen lekua, Leskungo bizilagunek esan oi zutenez. 

Azken egunetan egin duen elurteei esker, izugarrizko elur geruza batek dena estalia du. Gure txangoaren hasiera izango den San Martin Harriaren igoera guzian elurrak laguntzen digu (1.760 m). Behin kotxea aparkatu dugularik, kranpoiak janzteari ekin diogu eta arropaz ondo estaliz, termometroak zero azpitik markatzen bai du, piramide forma duen Arlas (2.044 m) mendiaren norabidean ibiltzen hasi gara. 

Monbiela muinoa (1.919 m) garaitu ostean, Arlas lepora iristeko (1.893 m) metro batzuek jaitsi beharrean gara. Bertatik ikusi dezakegu ibar behetik trabeskako eskiekin nolatan igotzen ari diren. Arlas gailurrera igotzeko asmorik gabe, indarrak eta gogoa badugu itzuleran saiakera egingo dugu, malda zeharkatzen saiatzen gara elurretan egina dagoen bidexka estu bat jarraituz, Arlas ibarraren gainetik.

Bertatik igarotzea zirraragarria egiten zaigu, edozein estropezuk erorketa zorabiagarriz ibarraren beheko zulora eramango gintuzke. Minutu batzuek urduri pasa eta dagoeneko askoz ere lasaiago Pescamou lepora (1.919 m) iritsi gara.

Metalezko aterpetxe bat ezkerrean eta Latras (2.045 m) gailur harritsua eskuinean utzi ditugu eta aurrerantz, Larra harri basamortu deritzanera jarraitzen dugu, Arrens de Anie deritzan karedun eremura. Anie gailurrera doan bide arrunta ezkerrera utzi dugu, uda partean oso erabilia, eta aurrera jarraitzen dugu gorantz, erabat elurtua aurkitzen den  karst eremua zeharkatuz.

Uda partean ibilbide hau oso bihurri eta arriskutsu izan oi da, pitzadura eta zuloz betea bai dago eta seinaleztapen eskasarekin, batez ere, lainoak estaltzeko zorte txarra badugu. Aurretik pasa direnen hanka arrastoak jarraituz aurrera goaz, ibilbidea asko erraztuz. Altuera irabazten goazen heinean ikuskizuna harrigarriagoa agertzen zaigu. Añelarra (2.358 m) ertzaren parez pare goaz Anie lepoa bila, azken jaitsiera txiki bat eginez iristen garelarik.  

Leku honetan mendigoizale askorekin topo egiten dugu, batzuek indarrak berreskuratu asmoz azken aldapari ekin aurretik eta besteak berriz, atsedenean gailurra zapaldu ondoren. Arrastoak jarraitzen segitzen dugu baina azken maldara iristean, bitan banatzen dela konturatu gara. Ezkerrekoa zuzen zuzenean igotzen zaigu gailurreraino eta eskuinekoa berriz, emeki-emeki, zeharkaldi batez altuera irabazten doa. Eskuinekoa jarraitzea aukeratu dugu eta ez gara bakarrak, ezkerrekoa berriz jaitsierarako erabiliko dugu. Batzuek eskiekin doaz, besteak gu tarteko kranpoiekin eta ikusi ere egin dugu bat snowboard taula bizkarrean duela. 

Aldapa tente jartzen ari da eta azken malda oso bertikala agertzen zaigu, esfortzu handi bat eskatzen digularik. Anie gailurrera iritsi gara (2.504 m) eta hainbeste jende dago bertan, egin dugun igoeraz gozatu ahal izateko apenas lekurik dugu.

Itxuraz jende askok hona etortzeko pentsamendu berdina izan dugu eta ez da harritzekoa, eguna zein ikuskizuna ezin hobea da. Argazki batzuek atera ditugu eta zuzenean oinpera jaisten gara, lehen alde batera utzi dugun bidetik, eta bertan zerbait jateko gelditu. Gogoz eta indarrez ondo aurkitzen gara eta itzuleran Arlas gailurrera (2.044 m) igotzen gara, txango eder honi bukaera ezin hobea eman asmoz.

 

 

 

 

 

 

 

 

 

 

Datu teknikoak

  • Ibilbidea: Auñamendi Anie San Martin Harritik
  • Igoera data:8/12/2013
  • Kokapena:Pirinioak
  • Kategoria : Kranpoiak
  • Zailtasuna:F+
  • Hasiera puntuan amaitzen da:Bai
  • Iristeko denbora:3:00 h
  • Nola iritsi:San Martin Harri edo Ernaz lepotik (1.760 m). 262 mugarritik hiru behien zerga ordaintzen den lekutik, 1.375-ko uztailaren 13 lehenengoz egin zelarik.
  • Igotzeko denbora:5:40 h
  • Jeisteko denbora:2:40 h
  • Ezaugarriak:Negu ibilaldia elur eta izotzean zehar
  • Materiala:Kranpoiak eta pioleta
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.