Batanes Hortzak

Capra Alpina(e)k idatzia.
4594
bisita

Batanes Hortzak kontutan izanik zein urrun kokatuak dauden eta gerturatze luze bezain desnibel handikoa duten, gehiegi ez bisitatuak izateko arrazoi izan daiteke. Horma bertikalezko hiru tontor dira, batez ere Erdiko eta Ekialdeko hortzak, Mendebaldekoa berriz oinez igo daiteke. Beraien artean zulo sakonez banaturik daude. Trabeskako eskia gustukoa dutenentzat berriz, Panticosa inguruan dagoen jaitsiera hoberena eskaintzen du.

Panticosako Harri Etxe aterpetxetik (1.636 m.) ateratzen gara eta Hotel Handia eskuinera utziz, Casa Bello hondakinen ingurutik doan harrizko eskailera igotzen dugu. Konponketa lanak egiten ari diren iturri baten ezkerretik bide zabal bat ateratzen da, GR11 arrasto gorri eta zuriek gorantz doaz sigi-saga ugari eginez.

Bachimaña lakuen desbidera azkar batetan iritsi gara 0:15 h. eta ezkerrera utziz, eskuinera maldan gora jarraitzen dugu. Jira eta bira ugarien ondoren, beste desbide berri batetara iritsi gara,  eskuinetik Brazato lakuetara doana (GR11) 0:50 h.

Gu berriz, ezkerrera biratuz oso zehatz ikusten ez den xenda jarraitzen saiatzen gara, Labaza lakuen norabidean. Sigi-saga ugariek behin eta berriz uhar bat zeharkatzea behartzen gaituzte eta behin gaindituz, lurperatua dagoen hodi baten ingurura eraman, Bachimaña eta Brazato isurialdeak lotzen dituena (2.140 m.) 1:15 h. 

Laster batetan harri handiz osaturiko malda batera iristen gara eta honaino ekarri digun bide arrastoa erabat desagertzen zaigu. Hemendik aurrera hitoak jarraitzen saiatu beharko gara.

Gutxika bada ere eta hito ugariei esker, gehiegi nire gusturako, aldapa luze eta tentea gainditzen goaz. Serrato lakua aurkitzen den lekura iritsi gara (2.470 m.) 1:45 h., bertatik Batanes Hortzak oso garbi ikusten ditugularik.

Gure eskuinetik lakua zeharkatzen dugu eta Dero Serrato ertzeko maldatik gorantz goaz granitozko bloke handien artetik. Labaza beheko lakua gordetzen duen muinora azkar batetan iristen gara (2.495 m.) 2:00 h.

Bertara jaitsi gabe maldan gora jarraitzen dugu, ertzetik erortzen den kontrahorma bat ezkerretik zeharkatuz, zirku txiki batera iritsiz, lakuaren goi-ibarrean (2.225 m.). Harri bloke handiz inguraturik gaude eta bertatik igotzea beharturik.

Batanes Hortzen hormara norabidean igotzen gara, Labaza goi lakua gordetzen duen kontrahorma gainditzeko (2.640 m.) 2:50 h.

2.700 kota inguruan gure ezkerrera kontrahormatik atera ahal izateko irtenbidea aurkitzen dugu. Horretarako bidean aurkitzen ditugun hito eta arrasto zuri beltzak laguntzen digute.

Behin gainditu eta lepo zabalera iristen gara (2.770 m.) 3:00 h., Bramatuero eta labaza isurialdeen muga. Ibilbide zati luzean lagundu digun eguzkiak, bat batean desagertu eta zerua erabat estali zaigu. Lainoa ere azaldu da eta Serrato mendiari oso itsura misteriotsua eman dio.

Eskuinera biratu eta Mendebaldeko Hortzera zuzentzen ditugu gure pausoak, hiruretan errazena, bertara oinez igo bai daiteke. Horretarako harrizko malda arin bat igotzen dugu eta inongo zailtasunik gabe Batanes Mendebaldeko Hortzera iritsi (2.878 m.) 3:15 h.

Haizea eta euria azken zati honetan bide lagun izan ditugu eta Erdiko Hortza ikusteko apenas aukerarik dugu, beregandik zulo sakon batek banatzen badigu ere. 

Atzera egitea erabaki dugu Bramatuero isurialdera jaisteko, zulora zuzenean jaisteko rapel bat egin behar baita. Behin bestaldean, bloke ezegonkor batzuetatik malda zeharkatzen dugu, zaila egiten bazaigu ere.

Erdiko eta Mendebaldeko Hortzak banatzen dituen zuloan gaude. Erdiko Hortza igo ahal izateko lehen irtengune bertikal bat eskalatzen hasi behar gara (III+), plaka trinko eta leun batera iritsiz (III-) eta behin gaindituta ertz airezko eta zorrotzean utziko gaitu, bertatik gailurrera iristeko (2.888 m.) 3:45 h.

Jaisteko irtengunearen gainean dagoen bilkurara destrepatu behar da, bertatik rapel bat egin bai daiteke zuloaren oinarrira.

Hirugarren eta altuena den Batanes gailurrera zuzentzen gara. Erdiko eta Ekialdeko tontorrak banatzen dituen zuloan gaude, oso ere ustela, itzulerakoan Labaza isurialdera rapelatu ahal izateko bilkura bat aurkitzen dugu. Elurrarekin 35/40º iristen den korridorea.

Tximinia estu eta bertikal batek (III/III+) erakarri gaitu eta dudarik gabe, bertan sartu eta eskalatzen hasi gara. Lainoak harria busti du eta oso arriskutsua dago, heltzen diogun bakoitzean eskuetan desegiten zaigu. Behin norbaitek arrazoi guztiarekin esan zuen bezala, honek Batanes Hortzen txantxarra dirudi.

Inongo segururik sartzeko aukerarik ez dugunez, destrepatzea erabaki dugu eta metro pare bat eskuinerago dagoen ezproi batetik saiatu (III), Panticosa isurialdera eramaten gaituena. Bertatik arroka oneko malda ezberdinak gaindituz (II), apenas zailtasunik dutenak, Ekialdeko Batanes gailurrera iristen gara (2.894 m.) 4:15 h.

Lainoa egonagatik ikuskizuna aparta da. Xuans eta Serrato gailurrak Erdi eta Mendebaldeko Batanes Hortzen bi aldetara ikusten ditugu. Labaza lakuak berriz kolorezko ukitua ematen dio.

Jaitsiera igo ez garen aldetik hasi dugu, badirudi igotzeko bide arrunta hau dela. Plaka leun (II) baten inguruan dagoen jendarme bateraino destrepatu beharrean gaude, zinta eta kordinoak dituena rapelatu ahal izateko (15/20 m.).

Rapelatu ordez destrepatzen jarraitzea erabaki dugu (II/II+) plaka leun eta tximinia estu batetik, gailurraren oinarriraino eta behin bertan, harriztatutako malda zeharkatu leporaino.

Hemendik aurrera egindako bidea desegin besterik ez dugu, Panticosako Harri Etxe aterpetxeraino (1.636 m.) 6:40 h.

 

 

Datu teknikoak

  • Ibilbidea: Ekialdeko Batanes Hortza Panticosa Bainuetxetik eta Labaza lakuetatik
  • Desnibela:1.258 m.
  • Kokapena:Pirinioak
  • Kategoriak : Ertza, Oinezko igoera
  • Zailtasuna:PD+
  • Harri eskaladaren zailtasuna:III+
  • Hasiera puntuan amaitzen da:Bai
  • Iristeko denbora:4:15 h
  • Nola iritsi:Panticosa Bainuetxeko Harri Etxe aterpetxetik eta Labaza lakuetatik
  • Igotzeko denbora:6:40 h
  • Jeisteko denbora:2:25 h
  • Ezaugarriak:Desnibel handia garaitu behar da. Erdi eta ekialdeko horatzak eskalatzeko esperientzia beharrezkoa izango da.
  • Materiala:Makilak, kaskoa eta soka
  • Egoera:Elurtuta badago baldintzak asko aldatzen dira.
  • Garaia: Uda, Udazkena
  • IBILBIDEAREN DATU GUZTIAK IKUSI

Datu teknikoak

  • Ibilbidea: Serrato-Labaza lakuak
  • Desnibela:864 m.
  • Kokapena:Pirinioak
  • Kategoria : Oinezko igoera
  • Zailtasuna:F
  • Hasiera puntuan amaitzen da:Bai
  • Iristeko denbora:4:15 h
  • Nola iritsi:Panticosa bainuetxeko aparkalekutik (1.636 m.)
  • Igotzeko denbora:6:40 h
  • Jeisteko denbora:2:25 h
  • Materiala:Makilak
  • Garaia: Uda, Udazkena, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.