Hiru Errege Mahaia Lescundik

4919
bisita

Jada pasa da denbora gure lehen korridorea egin genuenetik. Etxetik gertuko leku bat aukeratu genuen horretarako. Bi ordura aurkitzen zen. Gertu zegoenez, egun bertan egitea joan etorria pentsatu genuen. Hala ere, ez ginen konsziente elurra urtu behar zuen beroaz, ezta bidearen luzeraz ere. Egun hartan, Hiru Errege Mahaira igo ginen Lescundik.

Zortziak inguru dena prest genuen: Bota potoloak, eskuinetan makilak, motxila bizkarrean eta, barruan, kranpoiak eta pioletak. Ordu hortan prest egoteko goizeko bostetan atera ginen etxetik, baina zerbait polita egiteko gogoak neke guztia ahaztera bultzatu zigun.

(0h.) Pinuri batean sartu ginen kotxea utzi bezain pronto. Lac de Lhurs-era iristeko 2 ordu eta 10 minutu markatzen zuen kartel bat pasa genuen. Geroxeago bidetik aurkitu genuen elur bigunaren erruz, ezin izan genuen askoz azkarrago ibili. Baina saiatu, noski saiatu ginela. Lakura eramaten zuen pista gradualki hasi zen tente jartzen, nahiz eta hasiera nahiko malda leunarekin hasi.

(1h.) Basotik atera bezain laster, paisaia zoragarriaz gozatu ahal izan genuen. Pareta inguratzen ari ginen, bidetxurra geroz eta estuagoa zen eta begirada goruntz altxatzean, hantxe ikusi genuen Lac de Lhurseko bailarara sarbidea nondik zen. Behin bailararen hasierara iristean, kranpoiak jantzi behar izan genituen, elur zuria zapaltzen hasi baikinen.

(2h.) Lakuaren parean zegoen etxolara iritsi ginenean deskantsatu eta zerbait jatea erabaki genuen. Goizeko hamarrak ziren eta eguzkia jada berotzen hasia zen. 20 minuturen ondoren berriz goruntz abiatu ginen. Etxola bertatik sokaz lotuak ateratzea erabaki genuen. Gauza asko ekintza zehatz batzuk gaizki egiten ikasten dira, eta hau horietako kasu bat zen: sokaz elkarri lotzea arriskutsuagoa izan zen, ez baikenuen soka inongo segurutik pasa eta bat eroriz gero, denok atzetik eroriko ginen amildegian behera. Elurra oso gogorra zegoen eta elkarrekiko oso luze lotuta geuden...

(3h.30') Korridorearen oinarrian geuden eta elurra behar bezain gogorra zegoen. Igoera aseguratu nahi izan balitz, elurretako iltze batzuk ez ziren batere gaizki etorriko. Eta gure kasuan hauxe izango zen zuzenena, sokaz loturik igo baikinen. Teknika baina gogo gehiago genuen eta berehala hasi ginen goraka lehenik kranpoi bat eta ondoren pioleta sartzen genituela elurretan sekuentzialki. Ez zegoen atzera bueltarik. Korridorearen erdian, nire lagunak eta nik hots bat entzun genuen. Izotza irristatzen ari zela zirudien. Elkar begiratu ginen eta denbora baten ondoren, haizea besterik ez zela ohartu ginen. Hirugarren laguna gu geldi geratu ginela konturatu zenean, ea zergatik geratu ginen galdetu zigun. Ez dakit bera lasaitzearren edo beldurrik sentitzen ez genuela erakustearren izan zen, baina ez zela ezer pasatzen erantzun genion.

 (5h.) Igotzen amaitu genuenean, atzera begiratu eta igo genuena aztertu genuen, gero, itzuleran, jetsi egin beharko baikenuen. Momentu horretan berdin zitzaigun, paisaia zoragarria genuen eta gure oinen azpian. Auñamendi eta Hiru Errege Mahaiaren tartean geuden. Beheran, Lac de Lhurs utzi genuen. Zerbait jan ondoren, gure ezkerretara hartu genuen Tabla eta Mahaiaren artera iritsi arte. Aldapa handia igo genuen, baina arrisku handirik gabe. Behin goran geudenean, beste aldeko bailara ikusi ahal izan genuen. Bertan, eguzkiak bete betean jotzen zuen eta elurra guztiz biguna zegoen.

(6h.30') Hemendik tontorrera, ertz bat zeharkatzea besterik ez zitzaigun falta (I). Hala ere, izoztuta zegoenez, arriskutsua zirudien. Poliki eta kontuz pasatu ondoren, gure helmugara iritsi ginen (7h.).

Azkenik lortu genuen, baina oraindik korridorearen jetsiera falta zitzaigun. Eguardia zen jada eta eguzkia gogotik berotzen ari zen. Gauza asko gaizki egin genituen egun horretan: berandu irten ginen eta korridorean gaizki lotu ginen. Hala ere, baikorra izan behar da eta beti pentsatzen dut mendira joaten naizen bakoitzean zerbait berria ikasten dudala. Eta egun hartan horrelaxe izan zen.

Datu teknikoak

  • Ibilbidea: Hiru Erregeen Mahaia Lescundik
  • Luzera:22 m.
  • Desnibela:1.467 m.
  • Kokapena:Pirinioak
  • Kategoriak : Korridorea, Kranpoiak
  • Zailtasuna:PD+
  • Korridorearen graduazioa:45º
  • Eskalada mixtoaren zailtasuna:M2
  • Hasiera puntuan amaitzen da:Bai
  • Nola iritsi:Lescún herrian dagoen Anapia aparkalekuan utzi kotxea (D-340 errepidea).
  • Igotzeko denbora:7h
  • Jeisteko denbora:4h
  • Ezaugarriak:45ºko aldapa duen 300 m-ko desnibeleko korridorea. Amaieran, izotzareki zailagoa izan daiteken ertz motz bat (I+).
  • Materiala:Kranpoiak, kaskoa eta pioleta.
  • Egoera:Elur gogorra.
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.